काभ्रे,
काभ्रेमा यहि २० गतेदेखि जिल्ला स्तरीय बृहत खेलकुद महोत्सव हुने भएको छ । खेलकुद महोत्सव उदघाटनका लागि प्रधानमन्त्री ल्याउने तयारी गरिएको छ । काभ्रे जिल्लामा जिल्ला समन्वय समिति र जिल्ला खेलकुद विकास समिति काभ्रेको आयोजनामा जिल्ला स्तरीय बृहत खुलकुद महोत्सव हुने भएको छ । जिसस प्रमुख दिपक कुमार गौतमले खेल महोत्सवको तयारीमा जुट्न सबै खेलकुद संघका पदाधिकारीलाई आग्रह गर्नुभएको छ । महोत्सवको उघाटन पनौतीमा रहेको क्षेत्रीय रंगशालामा गरिनेछ । खेलहरु धुलिखेल, बनेपा र पनौती नगरपालिकामा खेलाईनेछ । महोत्सवमा राष्ट्रिय स्तरका खेल सहभागी गराइनेछ । २ हजार देखि २५ सय खेलाडी महोत्सवमा सहभागी हुने बताईएको छ ।
जिल्ला खेलकुद विकास समितिका अध्यक्ष मानवीर वाईबाको अनुसार महोत्सवमा कम्तिमा १२ वटा विधा खेल सहभागी गराइनेछ ।महोत्सवमा सहभागी खेलाडीलाई खाना र बस्ने ब्यवस्था आयोजकले नै गर्ने बताइएको छ । टिम दर्ता बापत सबै विधाका खेलको लागि २ हजारका दरले शुल्क लिइने छ भने सबै विधाका खेलबाट पहिलो हुनेले ३० हजार, दोस्रोले २० हजार र तेस्रो हुने टिमले १० नगद पुरस्कार पाउनेछन् । माघ ९ गतेसम्म टिम दर्ताको मिति तोकिएको छ । महोत्सवमा खेलको विधा थपिन सक्ने बताइएको छ ।
