काभ्रे,
आज सहिद दिवस, सङ्घ, प्रदेश र स्थानीयस्तरमा विभिन्न कार्यक्रम गरेर मनाइँदै छ । सप्ताहव्यापी सहिद दिवसको अन्तिम दिन आज काठमाडौँको शान्तिबाटिकाबाट प्रभातफेरी सुरु गरेर सहिद स्मारक लैनचौरमा स्मृति सभाको आयोजना गर्ने कार्यक्रम रहेको गृह मन्त्रालयले जनाएको छ । सहिद दिवसको अवसरमा राष्ट्रपति विद्यादेवी भण्डारीले शुभकामना दिँदै न्यायपूर्ण, समतामूलक एवं सुसंस्कृत समाज र समृद्ध राष्ट्र बनाउने सहिदको सपना पूरा गर्न आआफ्नो तर्फबाट भूमिका खेल्न आग्रह गर्नुभएको छ । प्रधानमन्त्री पुष्पकमल दाहाल ‘प्रचण्ड’ले सहिदहरूको सपना पूरा गर्न हातेमालो गर्दै अघि बढ्न आह्वान गर्नुभएको छ । नेपाली काँग्रेसका सभापति शेरबहादुर देउवाले दिवसका अवसरमा सन्देश जारी गर्दै देश र लोकतन्त्रको हित रक्षाका निमित्त सानातिना मतभेदलाई बिर्सेर सहिदको सपनालाई विपनामा रूपान्तरणका लागि सङ्कल्प गर्न सबैसँग आग्रह गर्नुभएको छ ।
