काभ्रे,
काभ्रे जिल्लामा अबबाट राहदानी (पासपोर्ट) बनाउनको लागि मिति बुकिङ गर्न कुनै बार कुर्न नपर्ने भएको छ । शुक्रबार (हिजो) बाट सार्वजनिक विदाको दिन बाहेक सबैदिन अग्रिम बुकिङ्ग सेवा लागु भएको छ । यस अघि विद्युतिय राहदानी आवेदकका लागि प्रत्येक मंगलबार र शुक्रबार दिउँसो २ बजे राहदानी अप्वाइन्टमेन्ट मितिको बुकिङ्ग खोल्ने गरिएकोमा सेवाग्राहीहरुको थप सहजताका लागि माघ २७ गते शुक्रबार दिउँसो २ बजे देखि प्रत्येक दिन (सार्वजनिक विदाको दिन बाहेक) अग्रिम बुकिङ्ग खुल्ला गरिएको सहायक प्रमुख जिल्ला अधिकारी महेश कुमार पोखरेलले जानकारी दिनुभएको छ ।
हाल अनलाईन फारम भर्दा धेरै त्रुटीपूर्ण विवरणहरु भर्ने गरिएको, आवश्यक कागजातहरु अपलोड नगरिएको, सम्बन्धित आवेदक भन्दा फरक व्यक्तिको विवरण कागजातहरु अपलोड हुने गरेको समेत पाइएको हुँदा अनलाइन फारम भर्दा सहि, स्पष्ट विवरण र आवश्यक कागजातहरु समेत अपलोड गरिदिनुहुन जिल्ला प्रशासन कार्यालय काभ्रेले सेवाग्राहीलाई अनुरोध गरेको छ । साथै कार्यालयले अप्वाइन्टमेन्ट मिति जुन दिन हो सोही दिनमा मात्र आवश्यक कागजात सहित उपस्थित हुन र राहदानी बनाउन आउँदा पहेलो र घाँटी छोप्ने कपडा नलगाउन, गरगहना नलगाउन र श्रृङ्गार नगरी आउन समेत अनुरोध गरको छ ।
