काभ्रे,
बालमैत्री नगरपालिका घोषणाको तयारीमा जुटेको नमोबुद्ध नगरको टोली नेपालकै पहिलो बालमैत्री नगर सुनवल पुगेका छन् । बालमैत्री स्थानीय शासन अध्ययनका लागि नगरप्रमुख कुन्साङ लामा, प्रमुख प्रशासकीय अधिकृत शिवप्रसाद लम्साल, वडाअध्यक्ष रामकृष्ण उपाध्यायसहित जनप्रतिनिधी, नगर युवा परिषद्का कार्यकारी उपाध्यक्ष रामेश्वर अधिकारी, नगर बालसञ्जालका पदाधिकारी, विषयगत शाखा प्रमुखसहित कर्मचारी समेतको टोलीले सुनवल पुगेर बालमैत्री नगर घोषणाको तयारी, यसको दिगोपना लगायतका विविध पक्षबारे जानकारी लिएका थिए । बालमैत्री स्थानीय तह घोषणाको लागि बाल बचाउ, बाल संरक्षण, बाल विकास, बाल सहभागिता, संस्थागत सहभागिता सम्बन्धी ५१ वटा सूचकहरु पुरा गरेर नेपालकै पहिलो बालमैत्री नगर घोसित भएको हो । २०७२ जेठ ३२ गते १० वटा वडा बालमैत्री घोषणा भएको सुनवलका १३ वटै वडा संघीय संरचनापछि २०७५ भदौ ३ गते नेपालकै पहिलो बालमैत्री नगर घोषणा भएको थियो ।
नमोबुद्ध नगरपालिका महिला, बालबालिका तथा समाजकल्याण उपशाखा प्रमुख तारादेवी सुनुवारले नमोबुद्धको वडा नं ४, ५, ७ र १० बालमैत्री वडा घोषणा उन्मुख भएको जानकारी गराउँदै बाँकी वडामा समेत अभियान तिव्र पारिने बताउनुभयो । सुनवल नगर प्रमुख अर्यालले बालमैत्री नगर घोषणा गर्दा निकै चुनौती भोगेको अनुभव सुनाउँदै यसको दिगोपना पनि उत्तिकै चुनौतीपूर्ण रहेको बताउनुभएको हो । नमोबुद्ध नगर प्रमुख लामाले पहिलो पटक बालमैत्री नगर घोषणा भएको सुनवललाई अभिभावक मानेर आफ्नो नगरलाई पनि छिट्टै बालमैत्री नगर पालिका घोषणा गर्ने प्रतिवद्धता जनाउनुभयो । सुनवल नगरपालिकाको महिला, बालबालिका तथा जेष्ठ नागरिक शाखा प्रमुख केशरी गैरे, नगर बाल सहजकर्ता सुम्निमा पन्थी सुनवलको बालमैत्री अभियानबारे जानकारी गर्नुभएको थियो ।
