काभ्रे,
काभ्रेको नमोबुद्ध नगरपालिका भकुण्डे स्थित नेपाली सेनाको २६ नम्बर वाहिनीको आवासीय भवन निर्माण गर्ने क्रममा केपी सिमेन्ट गुणस्तरहीन रहेको तथ्य फेला परेसंगै निर्माणाधीन भवन भत्काईएको छ । ठेकेदार कम्पनीले भवन निर्माण गर्न प्रयोग गरेको केपी सिमेन्ट गुणस्तरहीन भएपछि निर्माणाधीन उक्त भवन सेनाले भत्काएको हो । नेपाली सेनाको उक्त भवन निर्माण गर्न ब्राइट डायना जेभीले ठेक्का पाएको थियो ।
सैनिक भवन निर्माण गर्न प्रयोग भएको केपी सिमेन्टका कुनै बोरामा ३३ ग्रेड, कुनैमा ग्रेड मेटिएको र कुनैमा ग्रेड नै उल्लेख नभएका बोरा फेला परेका थिए । सिमेन्टको गुणस्तर पहिचान गराउने ग्रेडका बारेमा स्पष्ट नभएपछि सेनाको प्राविधिक टोलीले निर्माण सामग्रीको गुणस्तरबारे छानबिन गरेको थियो । ठेकेदार कम्पनीले खरिद गरेको ७५० बोरा केपी सिमेन्टमध्ये २६५ बोरा सिमेन्ट प्रयोग भइसकेको हुँदा बाँकी रहेको ४८५ बोरा सिमेन्टलाई दुईवटा ट्रकमा लोड गरी कम्पनीमा नै फिर्ता पठाएको थियो ।
