काभ्रे,
रोशी गाउँपालिका वडा नं. १२ निवासी गुणराज मुक्तानलाई सामुदायिक विद्यालय व्यवस्थापन समिति महासङ्घ नेपालको संघीय अध्यक्षमा निर्विरोध निर्वाचित भएपछि रोशि गाउँपालिकाले गाउँपालिकाको सभा हलमा एक कार्यक्रमको आयोजना गरि सम्मान तथा वधाई ब्यक्त गरेको छ । सामुदायिक विद्यालय व्यवस्थापन समिति महासङ्घ नेपालको यही चैत २१ र २२ गते काठमाडौंमा सम्पन्न प्रथम राष्ट्रिय सम्मेलनबाट रोशी गाउँपालिका वडा नं. १२ स्थित श्री गणेश मा.वि. का वि.व्य.स. अध्यक्ष गुणराज मुक्तान निर्विरोध निर्वाचित हुनुभएको हो । गुणराज मुक्तानको अध्यक्षतामा बनेको ८१ सदस्यीय समितिमा वरिष्ठ उपाध्यक्ष खड्गराज सेजुवाल, प्रदेश उपाध्यक्षहरूमा देवराज सुवेदी (कोशी), बलराम पोखरेल (मधेस), सोमबहादुर सापकोटा (बागमती), दामोदर बाँस्तोला (गण्डकी), नलबहादुर रानामगर (लुम्बिनी), देवीप्रसाद न्यौपाने (कर्णाली), ध्रुवराज उपाध्याय (सुदूरपश्चिम) र महिला उपाध्यक्ष पवित्रा घिमिरे चयन भएका छन् ।
महासचिवद्वयमा देवी खड्का र दुर्गानन्द ठाकुर, सचिवहरूमा काशीनाथ दङ्गाल (खुला), वीरेन्द्रराज विष्ट (खुला), मञ्जु नेपाल (महिला), मीनबहादुर विक (दलित), तेजबहादुर गुरुङ (आदिवासी जनजाति), श्रीकृष्ण थापा (खस आर्य), श्यामसुन्दर महतो (मधेसी), घनश्याम चौधरी (थारू), मोहम्मद समिम (मुस्लिम) र रामबहादुर टमाटा (पिछडिएको क्षेत्र) छानिनुभएको छ । यस्तै कोषाध्यक्षमा सरस्वती रायमाझी र सहकोषाध्यक्षमा ज्ञानेन्द्र अधिकारी निर्वाचित भएका छन् ।
नयाँ अध्यक्षबाट कार्यसमितिमा १५ सदस्य मनोनयन हुनेछ भने संस्थापक अध्यक्ष कृष्ण थापा पदेन रहनेछन् । निर्वाचित पदाधिकारी र सदस्यहरूको नामावली निर्वाचन समितिका सयोजक अधिवक्ता प्राणनाथ न्यौपानेले घोषणा गर्नुभएको थियो ।
शिक्षा, विकास तथा मानव स्रोत विकास केन्द्रका महानिर्देशक चुडामणि पौडेलले प्रमाणपत्र वितरण गर्नुभएको थियो । सम्मेलनले सामुदायिक विद्यालयसम्बन्धी आठ बुँदे घोषणपत्र जारी गरेको छ । यही चैत २० र २१ गते काठमाडौँमा भएको सम्मेलनको उद्घाटन प्रतिनिधिसभाका सभामुख देवराज घिमिरेले गर्नुभएको थियो ।
