काभ्रे,
राष्ट्रिय दुग्ध विकास बोर्डले दैनिक एक लाख २० हजार लिटर भारतबाट आयात गर्न सिफारिस गरेको छ । कृषि तथा पशुपन्छी विकास मन्त्रालयलाई बोर्डले बुझाएको प्रतिवेदन मागअनुसार दूध आपूर्ति हुन नसकेकाले ३ महिनाका लागि दैनिक १ लाख लिटरभन्दा बढी दूधको आयात खोल्न सुझाव दिइएको छ । गत कात्तिकमा पनि दूध अभाव भएपछि यसैगरी दैनिक परिमाणत्मक बन्देजसहित आयात खोलिएको थियो । उपकार्यकारी निर्देशक बालक चौधरीका अनुसार सरोकारवालासँग छलफलमा आधारित भएर बोर्डले यस्तो निचोड निकालेको हो । मन्त्रालयमा डेरी उद्योगहरुले भारतबाट धुलो दूध, कच्चा दूध र बटर आयात गर्न माग गर्दै निवेदन दिएका थिए ।
मन्त्रालयले उद्योगीको मागबारे छलफल र अध्ययन गरेर सिफारिस प्रतिवेदन बनाउन बोर्डलाई भनेको थियो । बोर्डले धुलो दूधको उत्पादन नेपालभित्रै बढेकाले आयात गर्नुनपर्ने निष्कर्ष निकालेको उपकार्यकारी निर्देशक चौधरीले जानकारी दिनुभएको छ ।
