अझ केही दिन देशभरको तापक्रम उच्च रहने मौसम पूर्वानुमान महाशाखाको अनुमान

काभ्रे,

देशभरको तापक्रम अझै केही दिन उच्च रहने मौसम पूर्वानुमान महाशाखाले अनुमान गरेको छ । काठमाडौं उपत्यकालगायत देशका अन्य उपत्यकाहरूमा समेत तापक्रम बढिरहेको र यो क्रम अझै केही दिन चल्ने मौसम पूर्वानुमान महाशाखाले जनाएको छ । विगत केही दिनदेखि देशका अधिकांश भू–भागको अधिकतम तथा न्यूनतम तापक्रम बढिरहेको छ ।
महाशाखाका अनुसार तल्लो र उपल्लो वायुमण्डलको अध्ययन र विश्लेषण अनुसार नेपालमा यस वर्ष मनसुन भित्रन पनि अझै केही दिन लाग्ने देखिएको छ । त्यसैले देशका तराई भू–भागहरूमा आगामी पाँच दिनसम्म तातो हावा अर्थात लू चल्ने सम्भावना रहने मौसमविद्ले बताएका छन् । मौसम पूर्वानुमान महाशाखाले आज देशका विभिन्न ठाउँको उच्च तापक्रम ४२ दशमलव २ डिग्री सेल्सियससम्म पुग्ने पूर्वानुमान गरेको छ । हिजो नवलपरासीको दुम्कौलीमा यो वर्षकै उच्च ४३ डिग्री सेल्सियस मापन गरिएको थियो ।