महामारीको रुपमा फैलिएको लम्पी स्किन रोगविरुद्धको १० लाख ३७ हजार मात्रा खोप आयात

काभ्रे,

महामारीको रुपमा फैलिएको लम्पी स्किन रोगविरुद्धका १० लाख ३७ हजार मात्रा खोप आयात भएको छ । गाईभैंसीको खोपकै लागि २०७९÷८० मा खर्च गर्ने गरी महानगरपालिका र सङ्क्रमण नफैलिएका जिल्ला बाहेक प्रत्येक स्थानीय तहमा महामारी नियन्त्रण गर्न संघीय शसर्त अनुदान अन्तर्गत १ लाखका दरले रकम विनियोजन भएको छ । सो रकमबाट औषधि उपचार तथा खोप खरिद गर्न सबै पालिकालाई आग्रह समेत गरिएको छ ।
आयातित मध्ये १ लाख ८० हजार भन्दा धेरै पशुमा खोप लगाउने कार्य सम्पन्न भएको पशु सेवा विभागले जनाएको छ । विभागका सूचना अधिकारी चन्द्र ढकालका अनुसार आयातित खोप ७ वटै प्रदेशका विभिन्न जिल्लामा १ लाख ८० हजार ९ सय २२ पशुमा खोप लगाईएको छ । नेपालमा लम्पी स्किन पहिलो पटक २०७७ असारमा मोरङ जिल्लाको सुन्दरहरैँचा नगरपालिकाका गाईहरूमा देखा परेको थियो । हालसम्म मनाङबाहेक ७६ जिल्लामा यो रोग पुष्टि भएको छ ।