काभ्रे,
हालसम्म देशभर २७ प्रतिशत धान रोपाइँ सम्पन्न भएको कृषि तथा पशुपन्छी विकास मन्त्रालयले जनाएको छ । गत वर्ष यहि अवधिमा मुलुकभर ४० प्रतिशत रोपाइँ सम्पन्न भएको थियो । गत वर्षको तुलनामा यस वर्ष १३ प्रतिशतको हाराहारीमा कम रोपाइँ भएको छ । हालसम्म बागमती प्रदेशमा ३०.७८ प्रतिशत रोपाइँ सम्पन्न भएको कृषि तथा पशुपन्छी विकास मन्त्रालयको तथ्याङ्कले देखाएको छ । सबैभन्दा बढी सुदूरपश्चिम प्रदेशमा ४८.९७ प्रतिशत रोपाइँ भएको छ भने कर्णाली प्रदेशमा ४५.०२ प्रतिशत, कोशी प्रदेशमा ३६.६७ प्रतिशत रोपाइँ भएको छ ।
त्यसैगरी लुम्बीनि प्रदेशमा २४.४३ प्रतिशत, गण्डकी प्रदेशमा १७.५५ प्रतिशत र सबैभन्दा कम मधेस प्रदेशमा ९.५३ प्रतिशत रोपाइँ भएको छ । विशेषगरि मधेश प्रदेश, गण्डकी प्रदेश र लुम्बिनी प्रदेशमा मनसुन सुरु हुन ढिलो भएकाले गत वर्षको तुलनामा रोपाइँ कम भएको मन्त्रालयका प्रवक्ता प्रकाश कुमार सन्जेलले जानकारी दिनुभयो । मनसुन शुरु हुने क्रमसँगै रोपाइँ हुने क्षेत्रफल बढ्दो क्रममा रहेकाले साउन १५ सम्म सामान्य हिसाबले ती प्रदेशमा रोपाइँ हुने मन्त्रालयले जनाएको छ । विगत वर्षहरूमा जस्तै यस वर्ष पनि शत प्रतिशत रोपाइँ हुने प्रारम्भिक अनुमान कृषि तथा पशुपन्छी विकास मन्त्रालयले गरेको छ ।
