यश कुमार परियार–बैशाख २१,
२०७७,काभ्रे/

जिल्लाको नमोबुद्ध नगरपालिकाले पहिलो चरणको राहत वितरण सम्पन्न गरेको छ । लकडाउनका कारण विपन्न र असांगठनिक क्षेत्रमा काम गर्ने मजदुर परिवारहरुलाई खाद्यान्न संकट पर्ने भन्दै नगरपालिकाले राहत सामग्री वितरण सुरु गरेको थियो ।

पहिलो चरणको राहत वितरण अन्तर्गत नगरपालिका भित्रका ११ वटै वडामा रहेका ५ सय ८० विपन्न परिवारमा राहत वितरण भएको प्रवक्ता एवं वडा नं २ का अध्यक्ष सञ्जीव ढकालले जानकारी दिए । उनका अनुसार नगरपालिकाबाट सबै वडामा गरी १७ हजार केजी चामल, ११ सय ६० केजी दाल, ११ सय ६० लिटर तेल ११ सय ६० प्याकेट नुन बितरण गरिएको छ ।

प्रवक्ता ढकालले वडामा आएका निवेदनका आधारमा राहत वितरण गरिएको र केहि विपन्न भित्र नपरेका र अरु कुनै क्षेत्रबाट राहत पाईसकेकाहरुलाई राहत वितरण नभएको बताए । साथै सुचना पुग्न बाँकि कोहि विपन्न र दैनिक ज्यालादारीको भरमा हात मुख जोड्ने कोहि भएमा नगरपालिकामा वा वडा कार्यलयमा सम्पर्क गर्न अनुरोध गरे ।

यसैबिच नगरपालिकाले स्थापना गरेको फुड बैंक र कोरोनाभाइरस रोकथाम तथा नियन्त्रण कोषमा सहयोग आउने क्रम जारी रहेको उनले जानकारी दिए । जसमा फुड बैंकमा १९ हजार केजी चामल, १२ सय केजी दाल, १३ लिटर तेल र १५ सय केजी नुुन सहयोग भएको उनले जानकारी दिए ।

Facebook Comments Box