काभ्रे,
नेपाली कांग्रेस काभ्रेले तेमालका व्लड क्यान्सर पीडित ११ बर्षीय अंकितकुमार मोक्तानको परिवारलाई सहयोग रकम हस्तान्तरण गरेको छ । काभ्रे क्षेत्र नं १ को प्रदेश सभा १ (क) को अगुवाइमा सहयोग संकलन गरी व्लड क्यान्सरबाट पीडित तेमाल गाउँपालिका वडा नं ७ का ११ बर्षीय अंकितकुमार मोक्तानको उपचारको लागि सहयोग रकम हस्तान्तरण गरीएको हो । संकलन भएको ३ लाख २७ हजार १ सय रुपैयाँ रकम आज (बुधबार) बागमती प्रदेश सरकारका खानेपानी, उर्जा तथा सिंचाई मन्त्री समेत रहेका नेपाली कांग्रेस काभ्रेका सभापति तीर्थ लामाले पीडित मोक्तानको बुबा अनिलकुमार मोक्तान र आमा शान्ती तामाङलाई हस्तान्तरण गर्नुभएको हो । सहयोग रकम नेपाली कांग्रेस प्रदेश १ (क) क्षेत्रीय कार्यसमिति सदस्यबाट संकलित १ लाख १ सय र अन्य सहयोगी दाताबाट संकलित रकम समेत गरी ३ लाख २७ हजार १ सय रकम हस्तान्तरण गरिएको अभियानको संयोजन गरेका नेपाली कांग्रेस प्रदेश १ (क) क्षेत्रीय कार्यसमितिका कोषाध्यक्ष रमेश तामाङले जानकारी दिनुभयो ।
सहयोग रकम हस्तान्तरण कार्यक्रम नेपाली काग्रेस क्षेत्र नं १ (क) का सभापति राम योञ्जन, तेमाल गाउँपालिका अध्यक्ष चन्द्रबहादुर तामाङ, भुम्लु गाउँपालिका उपाध्यक्ष दावा लामा, नेपाली कांग्रेस क्षेत्र नं २ (क) का सचिव सजय तामाङ, नेपाली कांग्रेस क्षेत्र नं १ (क) का कोषाध्यक्ष रमेश तामाङ, सदस्य डम्बर लामा, तेमाल गाउँपालिकाका प्रवक्ता इन्द्रलाल तामाङ, रोशी गाउँपालिकाका प्रवक्ता वसन्त लामा लगायत नेता तथा कार्यकर्ताको उपस्थिती थियो ।
