काभ्रे,
आजदेखि नयाँ आर्थिक वर्ष २०८०÷८१ सुरु भएको छ । बजेटमार्फत घोषणा गरिएका नयाँ कार्यक्रम र आर्थिक नीति आजैबाट कार्यान्वयनमा आउँदैछन् । चालु आर्थिक वर्षका लागि सरकारले कुल १७ खर्ब ५१ अर्ब ३१ करोड रुपैयाँको बजेट सार्वजनिक गरिसकेको छ । जसमध्ये चालुतर्फ ११ खर्ब ४१ अर्ब ७८ करोड, पुँजीगततर्फ ३ खर्ब २ अर्ब ७ करोड र वित्तीयतर्फ ३ खर्ब ७ अर्ब ४५ करोड रुपैयाँ खर्च हुने सरकारको अनुमान छ । चालु आर्थिक वर्षमा सरकारले पाँचतारे र सोभन्दा माथिका तारे होटल तथा विलाशी रिसोर्टले प्रदान गर्ने सेवा, आयातित मदिरा, १० लाख रुपैयाँभन्दा बढी मूल्यका हीरा, मोती, पत्थरजडित सुन वा बहुमूल्य धातुका गरगहनामा २ प्रतिशतका दरले विलाशी शुल्क लागु गरेको छ ।
विदेशमा पर्यटन भ्रमणका लागि जाने नेपाली पर्यटकले गर्ने भुक्तानी रकममा ५ प्रतिशतका दरले वैदेशिक पर्यटन शुल्क पनि आजदेखि लागु हुँदैछ । हवाई टिकटमा मूल्य अभिवृद्धि कर पनि आजदेखि नै लागु हुँदैछ । भ्याट लागेसँगै हवाई भाडा औसतमा ६ प्रतिशतले बढ्ने वायु सेवा सञ्चालक सङ्घले जनाएको छ ।
