यश कुमार परियार–जेठ १९,
२०७७,सिन्धुपाल्चोक/

सिन्धुपाल्चोक जिल्लाको पर्यटकिय स्थानमा रहेका होटलहरुलाई क्वारेन्टाईन बनाईने भएको छ । जिल्ला समन्वय समितिका प्रमुख कृष्ण गोपाल तामाङका अनुसार हाल निर्माण गरिएको क्वारेन्टाईनहरु पर्याप्त नभएको निष्कर्ष निकाल्दै सुकुटेमा रहेका ठुला होटलहरुलाई प्रयोगमा ल्याईने बताए । यसका लागि होटल व्यवसायिहरु सँग दोहोरो सम्झौता भईसकेको प्रमुख तामाङले जानकारी दिए । होटलहरुलाई क्वारेन्टाईनको रुपमा परिणत गरिसकेपछि उक्त क्वारेन्टाईनमा ४ सय भन्दा बढि मानिस राख्न सकिने अनुमान गरिएको उनको भनाई छ ।

सुकुटेमा रहेको होटलहरु मात्र नभई मेलम्चीमा रहेका होटलहरु, काठमाण्डौ र सिन्धुपाल्चोकको सिमाना भोटेचौरमा रहेको एक रिसोर्टलाई पनि क्वारेन्टाईन बनाउने विषयमा व्यवसायीहरु सँग सम्झौता भईसकेको प्रमुख तामाङले जानकारी दिए । हाल सिन्धुपाल्चोकमा क्षेत्रीय स्तरका ३ वटा क्वारेन्टाईन रहेका छन् । जसमा १ सय ११ जना छन् । उनिहरु मध्ये १ जना तिब्बतीयन नागरिक छन् ।

क्षेत्रीय क्वारेन्टाईनहरुमा कोरोना संभावित विरामी बोक्नका निमित्त १/१ वटा डेलिकेटेड कोरोना एम्बुलेन्स स्ट्यानबाई राखिएको उनले बताए । हाल सिन्धुपाल्चोक जिल्ला भर ४२ वटा आईसोलेसन कक्ष रहेको र कोरोना संभावित सम्पर्कमा आए तत्काल उपचारका निमित्त १० वेडको आईसोलेसन कक्ष तयारी अवस्थामा राखिएको प्रमुख तामाङले जानकारी दिए ।

क्वारेन्टाईनमा योग अभ्यासः

जिल्लामा रहेको ३ वटा क्वारेन्टाईनमा रहेका नागरिकहरुलाई योग अभ्यास सुरु गरिएको छ । आज (सोमबार) बाट चौतारा स्थित जिल्ला समन्वय समितिको भवनमा निर्मित क्वारेन्टाईनबाट योग अभ्यास सुरु गरिएको हो । क्वारेन्टाईनमा रहेका नागरिकहरुमा शारीरीक र मानसिक समस्या हुन सक्ने भन्दै मनोपरामर्श अभिमुखिकरण कार्यक्रम संचालन गरिएको प्रमुख तामाङले जानकारी दिए ।

हालको लागि हरेक क्वारेन्टाईनमा ३–३ दिनको फरकमा योग अभ्यास गराउने गरी तयारी भएको तर अब दैनिक रुपमा अभ्यास गराउने भन्ने विषयमा छलफल भईरहेको प्रमुख तामाङले बताए । क्वारेन्टाईनमा योग पतञ्जली जिल्ला कार्यलयका अध्यक्ष कमल अधिकारी र स्वास्थ्य कार्यलयका खोप अधिकृत पार्थमणी न्यौपानेले उक्त अभ्यास गराएका थिए ।

श्रमीक प्याकेजमा राहत वितरणः

जिल्लामा रहेको श्रमीकहरुलाई प्याकेज बनाएर राहत वितरण गरिएको छ । जिल्ला समन्वय समितिका प्रमुख कृष्ण गोपाल तामाङले असांगठनिक क्षेत्रमा काम गर्ने मजदुर परिवारलाई राहत वितरण गरिरहेको बताए । जिल्लामा रहेका स्थानिय तहहरुले आ–आफ्नो मापदण्ड अनुसार राहत वितरण गरिरहेको र जिल्लाले आवश्यकताका आधारमा विपन्न, मजदुर परिवारहरुलाई राहत वितरण गरिरहेको उनको भनाई छ ।

Facebook Comments Box