काभ्रे,
धरान उपमहानगरपालिकामा निषेधाज्ञा जारी गरिएको छ । जिल्ला सुरक्षा समितिको बैठकले आज राति १२ बजेदेखि २४ घण्टाका लागि निषेधाज्ञा जारी गरेको हो । धरानमा गोरु काटेर खाएको र मन्दिर अगाडि चर्च बनाएको भन्दै केही हिन्दु समर्थकले भोलि विरोध प्रदर्शनको आह्वान गरेका छन् । अर्को समुदायले त्यसको प्रतिकारमा उत्रने चेतावनी दिएको छ । यससँगै धरान बाहिरका मानिसहरू प्रदर्शनका लागि प्रवेश नगरुन् भन्नका लागि सबै नाकाहरूमा कडाइ गरिएको जिल्ला प्रहरी कार्यालय सुनसरीले जनाएको छ । अहिले धरान प्रवेश तरहरा, नहडा, झण्डा चोक, पानबारी र भेडेटारमा सुरक्षा सतर्कता बढाइएको जिल्ला प्रहरी कार्यालय मोरङका प्रहरी उपरीक्षक प्रभु ढकालले बताउनुभयो ।
यसैबिच, धरान उपमहानगरपालिकाका मेयर हर्क साम्पाङले सामाजिक सद्भाव कायम राख्नका लागि अपिल गर्नुभएको छ । गोरु काटेर सामूहिक भोज लगाएको भन्ने विषयले सामाजिक सद्भाव खल्बलिने त्रास बढेपछि मेयर साम्पाङले आज अपिल जारी गरेर सामाजिक सद्भाव नबिगार्न भन्नुभएको हो ।
