रोशी सहकर्मी–असार २,
२०७७,काभ्रे/

लकडाउनको अवधिमा पनि महिलामाथि हुने हिंसामा कमी आएको छैन । जिल्लामा पनि लकडाउनको पछिल्लो समय महिला हिंसाका घटनाहरु बढ्दै गएको जिल्ला प्रहरी कार्यालय काभ्रेले जनाएको छ ।

जिल्ला प्रहरी कार्यालय काभ्रेका अनुसार लकडाउनको समयमा चैत्र ११ गतेदेखि असार १ गतेसम्ममा जिल्लामा महिला तथा बालबालिकामाथि भएका ३६ वटा हिंसाका घटना कार्यालयमा दर्ता भएका छन् । दर्ता भएका हिंसाका घटनामध्ये सबैभन्दा धेरै घरेलु हिंसाका घटना दर्ता भएको कार्यालयको विवरणमा छ ।

विवरण अनुसार महिला तथा बालबालिकामाथि भएका हिंसामध्ये १५ वटा घरेलु हिंसाका घटना, १२ वटा आत्महत्या, ६ वटा जबरजस्ती करणीको मुद्दा, २ वटा बहु विवाह र १ वटा बालयौन दुरुपयोगको मुद्दा कार्यालयमा दर्ता भएका छन् । यसअघिको तथ्याङक अनुसार जिल्लामा महिला हिंसाका घटनाहरू उल्लेख्य हुने गरेको जिल्ला प्रहरी कार्यालय काभ्रेका सूचना अधिकारी कुमार विक्रम थापाले बताए ।

अहिले लकडाउनकै कारण पीडित महिला उजुरी गर्न प्रहरी र सम्बन्धित निकायसम्म पुग्न सकेका छैनन् । त्यसकारण पनि धेरै घटनाहरु घरभित्रै लुकिरहेकाले बाहिर आउन सकेका छैनन् ।

Facebook Comments