काभ्रे,
काभ्रेको रोशी गाउँपालिका वडा नम्बर २ काफलडाँडामा रहेको तीनधारे झरना निकै चर्चामा छ। बाहुबली झरनाको नाममा चिनिन थालेकोे तीनधारे झरनामा प्राय आन्तरिक पर्यटकको घुँईचो लाग्ने गरेको छ । सामाजिक सञ्जालमा झरनाका तस्वीर र भिडियोहरु आएपछि युवा पुस्ताहरू फोटो खिचाउन र रमाइलो गर्नकै लागि भएपनि तीनधारे झरनामा पुग्ने गरेका छन् । प्रकृतिको मनोरम दृश्य हेर्नका लागि यहाँ दैनिक ४ सयभन्दा बढी मानिस पुग्ने गरेका छन् भने सार्वजनिक बिदाको दिनमा यो सङ्ख्या झण्डै तेब्बरले बढ्ने गरेको स्थानीयहरु बताउदछन् । जसका कारण विकट क्षेत्र काफलडाँडामा तीनधारे झरनाका कारण चहलपहल पनि बढ्न थालेको छ । अहिले यो झरना काभ्रे आसपासका व्यक्तिहरुका लागि नयाँ गन्तव्यस्थल बनेको छ ।
पर्यटकको सङ्ख्या बढ्न थालेपछि स्थानीय सरकारले भौतिक संरचना व्यवस्थापनको काम सुरु गरेको छ ।पर्यटकको सजिलोका लागि होमस्टेसमेत सञ्चालनमा ल्याइएको छ । त्यसबाट मासिक १ लाखभन्दा बढी आम्दानी हुने गरेको तीन धारे होम स्टेका सञ्चालक सुरेन तामाङले जानकारी दिनुभयो । रोशी गाउँपालिकाले चालु आर्थिक वर्षको बजेट कृषि र पर्यटनमा प्राथमिकताका साथ विनियोजन गरेको बताउँदै आएको छ । गाउँपालिका अध्यक्ष दिनेश लामाले तीनधारे झरनासम्म पुग्ने सडक मार्ग र पैदल मार्ग व्यवस्थित गर्न तीन वटै सरकारबीच समन्वय गर्ने काम भइरहेको बताउनुभयो । झरनासम्म पुग्ने सडक व्यवस्थित नभएको कारण पर्यटकहरु समस्या झेल्न बाध्य छन् ।
