रोशी सहकर्मी–असार २२,
२०७७,काभ्रे/
कोरोना सङक्रमण फैलन नदिन लगाइएको बन्दाबन्दी (लकडाउन) को अवज्ञा गर्ने दुई हजार ३५० सवारी साधनलाई जिल्ला ट्राफिक प्रहरी कार्यालय काभ्रेपलाञ्चोकले कारवाही गरेको छ । उक्त सवारी साधन बन्दाबन्दी भएको सय दिनभित्रमा कारवाही परेका हुन ।
जिल्ला ट्राफिक प्रहरी कार्यालय काभ्रेका प्रमुख बिशाल तामाङले लकडाउन उल्लघंन गर्ने नौ सय ४७ वटा ट्रक, एक हजार ३६८ मोटरसाइकल, ३१ वटा कारभ्यान र चार वटा बस नियन्त्रणमा लिएर कारवाही गरिएको जानकारी दिनुभयो । उक्त कारवाहीमा परेका सवारी साधनबाट ट्राफिकले जरिवान समेत लिएको तामाङले जानकारी दिनुभयो । उहाँका अनुसार उक्त कारवाहीबाट २० लाख चार हजार राजश्व संकलन भएको छ ।
जसमा ट्रकबाट आठ लाख ८६ हजार, मोटरसाइकलबाट १० लाख ९९ हजार, कारभ्यानबाट १६ हजार पाँच सय र बसबाट दुई हजार पाँच सय रुपियाँ राजश्व संकलन भएको थियो । सरकारले कोरोना भाइरस सङक्रमण नियन्त्रणका लागि गत चैत्र ११ गतेदेखि लकडाउन घोषणा गरेको थियो ।
ट्राफिक प्रहरीले चैत्र ११ देखि मसान्त सम्ममा लकडाउन उल्लंघन गर्ने दुई सय ५० सवारीबाट एक लाख ७७ हजार रुपियाँ राजश्व संकलन गरेको थियो । त्यस्तै वैशाख महिनामा चार सय सवारीबाट तीन लाख ६१ हजार पाँच सय रुपियाँ संकलन भएको थियो । जेठ महिनामा सबै भन्दा बढी एक हजार ९७ सवारी नियन्त्रणमा लिइएको थियो । जेठमा नौ लाख ५४ हजार रुपियाँ राजश्व संकलन भएको कार्यालयले जनाएको छ । असार १७ गतेसम्ममा नियन्त्रणमा लिइएका छ सय तीन सवारीबाट पाँच लाख ११ हजार पाँच सय रुपियाँ संकलन भएको कार्यालयको तथ्याङ्क छ ।
