रोशी सहकर्मी–असार २६,
२०७७,काभ्रे/

काभ्रेपलाञ्चोक जिल्लाका थप तीन जनामा कोरोना पुष्टि भएको छ । स्वास्थ्य कार्यालयका वरिष्ठ स्वास्थ्य प्रशासक डा। नरेन्द्रकुमार झाले बनेपा नगरपालिका १३ भैँसेपाटी, पनौती नगरपालिका वडा नम्वर २ कुशादेवी र वडा नम्वर ९ सुन्थानमा रहेका ब्यक्तिहरुमा कोरोना सङक्रमण पुष्टी भएको जानकारी दिनुभयो ।

उहाँका अनुसार बनेपा भैँसेपाटीका युवा र पनौती कुशादेवीमा भेटिएकी सङक्रमित महिला विदेशबाट आएका होइनन । भने पनौती सुन्थानका सङक्रमित युवा १५ दिन अघि कोरियाबाट फर्किएका थिए । उनले कोरोना संक्रमणको रिपोर्ट नेगेटिभ भएको कागजपत्र बोकेर घरमा बसेका थिए । १५ दिन पछि उनी इपिएस फाराम भर्न काठमाडौं गए । फाराम भर्ने स्थानमा उनलाई पीसीआर मागियो । पहिलाको रिपोर्ट अमान्य भएकाले पाटन अस्पतालमा पुनः परिक्षण गरे । उनमा कोरोना संक्रमण देखियो । उनी समुदायमा घुलमिल भईसकेका थिए ।

त्यस्तै बनेपाका युवा काठमाडौं बस्न गएपछि क्वारेन्टाइनमा राख्न भनिएको भएपनि उनले आफूलाई कोरोना नरहेको भन्दै बस्न अस्वीकार गरेपछि पीसीआर परीक्षण गरिएको थियो । उनमा पनि रिपोर्ट पोजेटिभ आएको थियो । पनौती नगरपालिका वडा नम्वर २ कुशादेवी घर भएकी महिला पनि एक साता अगाडि सर्पले टोकेपछि उपचारका लागि बनेपाको शिरमेमोरियल अस्पताल गएकी थिइन तर सर्पले टोकेको औषधि पाटन अस्पतालमा मात्र रहेकाले उनलाई पाटन रिफर गरिएको थियो । पाटन अस्पतालले महिलालाई सर्पले टोकेको उपचारसँगै कोरोना संक्रमण परिक्षण गरेको थियो ।

उपचार पछि उनि घर फर्किईन । तर रिपोर्ट समयमै आएन । घरमा आए पछि उनलाई भेट्न मानिस आए । शुक्रबार मात्रै उनलाई कोरोना पोजेटिभ भएको जानकारी भयो । यस अघि पनौती नगरपालिकामा एक महिलालाई कोरोना देखिएको थियो । उनलाई कहाँबाट संक्रमण भयो अहिलेसम्म पत्ता लागेको छैन । उनको सम्पर्कमा आएका ब्यक्तिहरुको परिक्षण गर्दा समेत कोरोना कोबाट संक्रमण भएको हो पत्ता लागेन । उनी निको भएर घर फर्किएकी छिन् ।
काभ्रेमा हालसम्म तीन जना थपसँगै १८ जनामा कोरोना पुष्टि भएको छ । बिना हिस्ट्रिका सङक्रमति भेटिन थालेपछि स्थानीयमा त्रास बढ्न थालेको छ । -गोरखापत्र अनलाइनबाट

Facebook Comments