काभ्रे,
काभ्रेपलाञ्चोक जिल्लामा पहिलोपटक पुस्तक मेला सुरु भएको छ । बनेपा– ७ चारदोबाटोमा न्यू प्रगति पुस्तक भण्डारको आयोजना तथा जनमत वाङमय प्रतिष्ठानको सहकार्यमा जिल्लामा पहिलोपटक ‘प्रगति वाङमय पुस्तक मेला’ सुरु भएको हो । लेखक तथा साहित्यकार अमर न्यौपानेले आज (शुक्रबार) बिहान ‘प्रगति वाङमय पुस्तक मेला’ को उद्घाटन गर्नुभएको हो । मेला उद्घाटन कार्यक्रममा साहित्यकार न्यौपानेले अहिलेको युगमा टोलटोलमा पुस्तकालय हुनुपर्नेमा जोड दिनुभएको छ । जहाँ गएर वृद्ध–वृद्धा, केटा–केटी र युवा–युवतीले ज्ञानगुणका कुरा र देश विदेशका कुराहरू हेर्न र पढ्न पाउने खालको पुस्तकालय हुनुपर्ने र यसको व्यवस्था स्थानीय सरकार, प्रदेश सरकार र संघीय सरकारले गर्नुपर्ने न्यौपानेको भनाइ छ।
बालबालिकाहरूमा पढ्ने बानीको विकास गर्नका लागि प्रगति वाङमय पुस्तक मेलाको आयोजना गरेको न्यु प्रगति पुस्तक भण्डारका प्रोप्राइटर भुवन मानन्धरले बताउनुभएको छ ।
आजबाट सुरु भएको मेला फूलपातीको दिनसम्म चल्ने मानन्धरले बताउनुभयो । मेलामा आउने दर्शकको माग भएमा अझ बढाउन सकिने उँहाले बताउनुभयो । मेलामा पुस्तक किन्न चाहनेलाई हरेक पुस्तकको मूल्यमा २० प्रतिशत छुट दिने उनले बताए। मेलामा नपाएको पुस्तक अर्डर गरेमा उपलब्ध गराउने उँहाको भनाइ छ।
