काभ्रे,
नमोबुद्ध नगरपालिका–४ मा रहेको मेथिनकोट अस्पतालमा सिटी स्क्यान सेवा पनि उपलव्ध हुने भएको छ । अस्पतालमा सिटी स्क्यान सेवा सञ्चालनका लागि हिजो कान्ति बाल अस्पतालले सामाग्री हस्तान्तरण गरेको छ । अब छिट्टै सेवा सञ्चालनमा आउने अस्पतालका निमित्त मेडिकल सुपरिटेन्डेन्ट डा. मधुकर दाहालले जानकारी दिनुभयो ।मेथिनकोट अस्पतालमै सिटीस्क्यान सेवा सञ्चालनमा आएसँगै नागरिकले निजी अस्पतालमा चर्को शुल्क तिरेर सेवा लिनुपर्ने बाध्यता हट्ने भएको छ ।
अस्पतालले केहि समय अघि सिटी स्क्यान मेसिन ल्याउने पहल गरिदिन नमोबुद्ध नगरपालिकालाई पत्राचार गरेको थियो । नगर कार्यपालिका वैठकले स्वास्थ्य मन्त्रालय, कान्ति बाल अस्पतालाई अनुरोध गर्ने निर्णय गर्दै पत्राचार गरेको थियो ।
मंगलबार नगर प्रमुख कुनसाङ लामा, अस्पताल व्यवस्थापन तथा सञ्चालन समितिका अध्यक्ष कृष्णप्रसाद खनालको उपस्थितीमा कान्ति बाल अस्पतालका निर्देशक डा. पंकज रायले मेथिनकोट अस्पतालका निमित्त मेडिकल सुपरिटेन्डेन्ट डा. मधुकर दाहाललाई सामाग्री हस्तान्तरण गरेका थिए । आफ्नो सेवा विस्तार गर्दै लगेको अस्पतालले हालसालै मृगौलाको डाइलासिस सेवा शुरु गरेको छ भने शल्यक्रिया सेवा पनि शूरु गरेकोे छ ।
