काभ्रे,
इजरायलमा रहेका २ सय ५४ नेपाली आज बिहान साढे १ बजे काठमाडौँ आइपुगेका छन् । ५ सय ३ जनाले नेपाल फर्कन आवेदन दिएकोमा २ सय ५४ जनालाई ल्याइएको परराष्ट्रमन्त्री एनपी साउँदले पत्रकार सम्मेलनमा जानकारी दिनुभयो । घर फर्कन चाहेका अरु नेपालीलाई पनि उद्धारका लागि सरकारले पहल गरीरहेको छ । नियमित उडानबाट भए पनि बाँकी नेपालीको उद्धार गर्ने सरकारको तयारी रहेको छ ।
स्वदेश फिर्ता हुने टोलीमा हमासको आक्रमणबाट जोगिएका वीरेन्द्र चौधरी, प्रमोद केसी र धनबहादुर चौधरी पनि आएका छन् । आक्रमणमा परी घाइते भएका प्रविन डाँगी, विधान सेजुवाल र हिमाञ्चल कट्टेलको भने इजरायलमै उपचार भइरहेको छ । आक्रमणमा परेका विपिन जोशी अझै बेपत्ता छन् । १७ जनाको समूहमा भएको आक्रमणमा परी १० जना नेपालीको मृत्यु भएको थियो । शव ल्याउने प्रक्रिया जारी रहेको जानकारी दिँदै परराष्ट्र मन्त्रालयले प्रक्रिया पूरा भएपछि नेपाल ल्याइने जनाएको छ ।
