सार्वजनिक सवारी सञ्चालनमा आएपछि बनेपाबाट बस चढ्दै यात्रु ।

रोशी सहकर्मी–साउन १२,
२०७७,काभ्रे/

सरकारले अन्तर जिल्ला सार्वजनिक बस सञ्चालन गर्न नदिएपछि यात्रुले सास्तीसँगै महङ्गो भाडा तिर्न बाध्य भएका छन । काभ्रेपलाञ्चोक जिल्ला उपत्यकासँग जोडिएको जिल्ला भएपनि सार्वजनिक बसलाई उपत्यका प्रवेशमा रोक लगाइएको छ । यो नियमले यात्रु सास्तीसँगै महङ्गो भाडामा परेका हुन ।

काभ्रे पुण्यमति यातायात प्रालीका अध्यक्ष राजेशसुन्दर सैँजूले काभ्रेबाट गएका बस साँगासम्म मात्र जान पाउने बताउनुभयो । हामीलाई उपत्यका जान नदिएपछि उपत्यका हिडेका यात्रुलाई साँगामा छोड्ने गरेका छौँ । त्यसपछि उहाँहरु निजी सवारी साधन वा पैदलमा जानु हुन्छ । उपत्यका सार्वजनिक बस सञ्चालन गर्न नदिएपनि मानिसलाई भने निर्वाध प्रवेश दिइएको छ । कोरोना मानिसले लैजाने हो । सैँजु आक्रोस पोख्दै भन्नुभयो, कि त यात्रुको चेक जाँच हुनु प¥यो होइन भने सार्वजनिक यातायात किन रोक्ने ?

भक्तपुर जिल्लाबाट सञ्चालित बस जगातीबाट मात्र सञ्चालन हुँदा साँगा देखी जगातीसम्मको करिब तीन किलोमिटर यात्रुहरुले निजी यातायात वा हिडेर गन्तव्य पुग्नुपर्ने बाध्यता रहेको यात्रुहरुको गुनासो छ । बनेपाबाट सार्वजनिक बसमा गए दुई सय रुपियाँमा उपत्यकाबाट आउजाउ गर्ने यात्रुले अहिले छ सय देखी आठ सय रुपियाँसम्म भाडा तिर्नुपर्ने बाध्यता रहेको बनेपाका स्थानीय कृष्ण गौतमले गुनासो गर्नुभयो । उहाँका अनुसार साँगा चेक पोष्ट भन्दा केही तल बसेका निजी गाडीले जगातीसम्म करिब तीन किलोमिटरको एक सय देखी दुई सय रुपियाँ सम्म भाडा लिने गरेका छन ।

सरकारले कोरोना सङ्क्रमणको जोखिम रहेको भन्दै हाल जिल्लाभित्र मात्रै सार्वजनिक सवारी साधन चलाउन दिएको छ । साउन ८ देखी जिल्लामा सवारी साधन सञ्चालनमा आएसँगै बजारमा चहलपहल सुरु भएको छ । बिना माक्स ओहोरदोहोर हुँदा कोरोनाको जोखिम हुने भन्दै स्थानीय त्रसित हुन थालेका छन ।

Facebook Comments