काभ्रे,
नमोबुद्ध नगरपालिका–१ फूलबारीमा प्रथम नमोबुद्ध सेभेन ए साइड फुटबल प्रतियोगिता शुरुभएको छ । फूलबारी युवा क्लव तथा मानेगाउँको आयोजनामा आजबाट प्रथम नमोबुद्ध सेभेन ए साइड फुटबल प्रतियोगिता शुरु भएको हो । नकआउटका आधारमा खेलाइने प्रतियोगितामा १९ टिमको सहभागिता जनाएका छन् । बाग्मती प्रदेशका खानेपानी, उर्जा तथा सिंचाइमन्त्री तीर्थ लामाले प्रतियोगिताको उद्धघाटन गर्नुभएको हो ।
उद्घाटन कार्यक्रममा बोल्दै मन्त्री लामाले खेलकुदले युवाहरुमा एकता कायम गर्न सहयोग पुग्ने बताउनुभयो । नमोबुद्ध नगर प्रमुख कुनसाङ लामाले खेलकुदको बिकासको लागि नगर प्रतिवद्ध रहेको बताउदै अन्तर्राष्ट्रिय खेल खेल्ने जनशक्ति उत्पादन गर्नुपर्ने बताउनुभयो । त्यसैगरी रोशी गाउँपालिका अध्यक्ष दिनेश लामाले खेलमार्फत सो स्थानको पर्यटन प्रवर्द्धनका साथै व्यक्तित्व विकास हुने तर्क गर्नुभयो । ।
उद्घाटनमा नमोबुद्ध नगरपालिकाका वडा अध्यक्षहरु, रोशी गाउँपालिका अध्यक्ष दिनेश लामा, नगर युवा परिषदका कार्यकारी उपाध्यक्ष रामेश्वर अधिकारी लगायत स्थानीयको उपस्थिति थियो ।
