काभ्रे,
जाजरकोटको रामिडाँडा केन्द्र विन्दु बनाएर गएको भूकम्पका कारण विद्यार्थीहरू प्रभावित भएका छन् । भूकम्प गएको ४० दिन बित्दैछ । भूकम्पका कारण प्रभावित बालबालिकाहरू विद्यालय जान मानिरहेका छैनन् भने गएकाहरूको पनि पढाइमा ध्यान दिन जान सकेको छैन । बालबालिकालाई मनोपरामर्शका लागि जनशक्ति खटाइए पनि उनीहरूमा त्रास छ ।रुकुमको आठबिसकोट नगरपालिका वडा नम्वर १४ मा रहेको जनविकास माविमा कक्षा १० मा पढ्ने सङ्गिता मल्लले जाजरकोट भूकम्पले दिएको पीडा अहिले पनि भूल्न नसकेको बताउनुभयो ।
एउटै घरमा सुतेका आमा, फुपु र दिदीको मृत्यु भएको र आफूलाई च्यापिएको अवस्थामा उद्धार गरिएको सम्झँदा डर लाग्ने सङ्गीता बताउनुहुन्छ । घरमा पनि बालबालिका तथा विद्यार्थीले सुरक्षित महसुस गर्न सकेका छैनन् । भूकम्पपछि बालबालिकामा देखिएका तनाव र चिन्ता कम गर्न विभिन्न सङ्घसंस्थाका मनोविमर्शकर्ता पनि गाउँगाउँमा पुगेका छन् । भूकम्पपछि राहत, पुनःनिर्माण र अस्थाई आवासको व्यवस्थापनमा सरकारले दिएको चासो चिन्ता देखेर प्रभावितहरू खुसी छन् । तर बालबालिकाको बारेमा पर्याप्त नसोचिएको गुनासो अभिभावक र सरोकारवालाको छ । भूकम्पमा परी रुकुम पश्चिममा मात्रै १ सय ८ विद्यालयमा पूर्ण क्षति पुगेको छ भने ३५ विद्यार्थीको मृत्यु भएको छ ।
