काभ्रे,
काभ्रे जिल्लाको बेथानचोक गाउँपालिका वडा न. २ स्थित पाट्नेखोला साँघुको मुख ढुंखर्क पुलको शिल्यान्यास भएको छ । आज शहरी विकास मन्त्री सिता गुरुङ्गले सो पुलको शिल्यान्यास गर्नुभएको हो । पुल शिल्यान्यासकै अवसरमा वडा नम्वर २ र ३ मा शुरु गरिएको बस्ति विकास कार्यक्रम अन्र्तगतको नयाँबस्ती दुर्लुङखोला सडक स्तरोन्नती कार्यको पनि शुरु गरिएको छ ।
कार्यक्रममा बोल्दै मन्त्री गुरुङ्गले ढुंखर्क–च्याम्ब्राङ्गबेशी–सुकुमफेदी–सालघारी–हुचिटार–अँघेरी–झुरझुरेसम्मको सडकलाई सहायक राजमार्गका रुपमा प्रस्तावित गरिएको बताउनुभयो । बेथान्चोकको पाट्नेखोला साँघुको मुख ढुंखर्क पुल निर्माणको शिल्यान्यास गर्दै मन्त्री गुरुङ्गले प्रदेशको राजधानी जोड्ने उक्त सडकलाई बैकल्पिक राजमार्गका रुपमा मन्त्रालयले प्रस्ताव गरेको उँहाको भनाई छ ।
बेथान्चोक गाउँपालिकालार्ई शिक्षा, सडक, पुल, सिंचाई, पर्यटन, कृषि तथा पशुपालनबाट समृद्ध बनाउने अभियानमा सक्रिय रहेको गाउँपालिका अध्यक्ष भगवान अधिकारीले भन्नुभयो । यो सडक निर्माण कार्यको प्रारम्भ भएसँगै बेथान्चोकलाई दुई मार्गको मुख्य खण्डको निर्माणले नागरिकहरुलाई थप सहज र सरल यात्राका लागि बैकल्पिक मार्ग महत्वपूर्ण हुने उँहाको भनाई छ ।
प्रदेश सभा सदस्य कञ्चनचन्द्र बादे, गाउँपालिका अध्यक्ष भगवान अधिकारी, निर्वतमान अध्यक्ष प्रेमबहादुर तिमल्सिना, उपाध्यक्ष तारा राना तिमल्सिना, वडा अध्यक्ष पुरुषोतम तिमल्सिनाले उक्त सडक र पुलको निर्माणले प्रदेश राजधानीसँग जोडिने मार्ग सहज हुने बताएका छन् ।
भ्याटसहित ४ करोड ५६ लाख ६४ हजार १ सय ३२ रुपैयाँको लागतमा उक्त पुल निर्माण हुनेछ । सडक डिभिजन कार्यालय भक्तपुर मार्फत २०८० कार्तिक २३ गते सम्झौता भएको आयोजना २०८१ कार्तिक २२ गते सम्पन्न हुने गरी खम्पाचे–गोल्मादेवी इञ्जिनियरिङ जेभीले ठेक्का लिएको हो ।
