काभ्रे,
नेपाली कांग्रेसका सभापति शेरबहादुर देउवाले नेपालका राजनीतिक दलहरूबीच भिन्न विचार र सिद्धान्त रहे पनि हार्दिकतापूर्ण सम्बन्ध रहेको उल्लेख गर्नुभएको छ । राष्ट्रिय मेलमिलाप दिवसको सन्दर्भमा नेपाली कांग्रेसले आज काठमाडौँमा आयोजना गरेको कार्यक्रममा उहाँले चुनावमा कडा प्रतिस्पर्धा गरे पनि आपसी मेलमिलाप र भाइचाराको सम्बन्ध उदाहरणीय रहेको बताउनुभयो ।
बीपी कोइरालाले लिएको मेलमिलापको नीति अहिले पनि उत्तिकै सान्दर्भिक रहेको उहाँको भनाइ छ । बीपी कोइरालालाई राजनीतिका साथै अरू धेरै कुरामा विशिष्ट प्रतिभा भएको व्यक्तिका रुपमा स्मरण गर्नुपर्ने भन्दै सभापति देउवाले राष्ट्रियता, विकास र आर्थिक समृद्धिका विषयमा दलहरु एकतावद्ध हुनुपर्नेमा जोड दिनुभयो ।
