काभ्रे,
रोशी गाउँपालिका वडा नम्बर २ स्थित लक्ष्मी नारायण माध्यमिक विद्यालयमा सामाजिक परीक्षण, अभिभावक भेला तथा चाडपर्वको उपलक्ष्यमा शुभकामना आदान प्रदान कार्यक्रम सम्पन्न भएको छ । विद्यालयको पारदर्शिता तथा सुशासन कायम गर्दंै विद्यालयको लेखापाल महेश्वर खत्रीले कुल आय २१७६९९७५। र कुल व्यय २१७६९९७५। भएको बताउनुभयो ।कार्यक्रमको सभापति तथा विद्यालय व्यवस्थापन समितिको अध्यक्ष चन्द्र बहादुर लामाले कक्षा ९ देखि १२ सम्मको कृषि विद्यालयलाई आवश्यक पूर्वाधारको क्षेत्रमा विकास गर्ने उदेश्य रहेको बताउनुभयो । विद्यार्थीहरुमा सिक्ने जिज्ञासा, शिक्षकले अध्यापन गर्ने जिम्मेवारी र अभिभाकवले असल संस्कार र आफ्नो अभिभावकत्व पूर्ण रुपमा निभाउन सकेमा असल विद्यार्थी र गुणस्तरीय शिक्षामा बढावा हुने धारणा व्यक्त गर्नुभयो ।
कार्यक्रमको अवसरमा रोशी गाउँपालिका अध्यक्ष दिनेश लामाले वास्तवमा समाजको लागि आवश्यक एक महत्वपूर्ण तत्व प्राविधिक शिक्षा रहेको र प्राविधिक शिक्षालाई प्रवर्धन गर्न गाउँपालिकाको पनि योजना रहेको बताउनुभयो । साधारण शिक्षाको सर्टिफिकेट लिएर भौतारीरहेको अवस्थामा समय परिवेश अनुकुल प्राविधिक शिक्षा आवश्यक रहेको आगामी १० वर्षमा आवश्यक प्राविधिक धारको जनशक्ति रोशीमै उत्पादन गर्ने लक्ष्य रहेको बताउनुभयो । विद्यालयको आवश्यकतालाई परिपूर्ति गर्न रोशी गाउँपालिकाले आवश्यक सहयोग गर्ने प्रतिवद्धता पनि व्यक्त गर्नुभएको छ ।
त्यसैगरी उपाध्याक्ष मिम बहादुर वाईवा ज्वालाले महामारीको रुपमा फैलिएको डेँगी रोगको प्रकोपबाट बच्नको निम्ति बालबालिका,अभिभावक, शिक्षक तथा समुदायलाई आव्हान गर्दै रोशीमा कृषिको क्षेत्रमा अत्यन्त सम्भावना रहको र यहि विद्यालयको माध्यमबाट दक्ष जनशक्ति उत्पादन भई कृषि र प्राविधिक शिक्षामा रोशी नमुना बन्न सक्ने धारणा व्यक्त गर्नु भयो । कार्यक्रममा एस. ई. ई. रोशी १,२,३ मध्येबाट उत्कृष्ट अंक ल्याउने छात्रा छात्रा, अतिरिक्त कृयाकलापमा उत्कृष्ट छात्रा छात्रालाई सम्मान सहित नगद पुरस्कार प्रदान गरिएको थियो ।
कार्यक्रममा वडा नम्बर २ को वडा अध्यक्ष हस्तमान लामा, सिर्जनशील युवा समूहको अध्यक्ष मिम बहादुर लामा, विद्यालयको प्रधानाध्यापक काजीमान लामा, कोओर्डिनेटर गण बहादुर जिम्बा, लगायतका व्यक्तित्वहरुले शुभकामना प्रदानको साथसाथै बालबालिकाहरुलाई नगद सहित सहयोग गरिएको छ ।
