रोशी सहकर्मी–असोज ३,
२०७७,फलामेसाँघु/

रोशी गाउँपालिका वडा न १ को फलामेसाँघुमा १० शैयाको अस्पताल बन्ने प्रक्रिया सुरु भएको छ । नेपाल सरकारको एक स्थानीय तह एक अस्पताल नीति अनुरुप रोशी गाउँपालिकाले वडा न १, २ र ३ को संगमस्थल फालमेसाँघुमा १० शैयाको अस्पताल बनाउने प्रक्रिया सुरु गरेको हो ।

रोशी गाउँपालिकाका प्रमुख प्रशासकीय अधिकृत डम्बरु दाहालले तत्काल पाँच शैयाको अस्थायी अस्पताल निर्माण गर्ने र त्यसैलाई पछि स्तरोन्नति गरेर १० शैया बनाइने जानकारी दिनुभयो । नेपाल सरकारले प्रत्येक स्थानीय तहमा कोभिड नियन्त्रणका लागि ५/५ शैयाको अस्थायी अस्पताल बनाउन १०/१० लाख रुपियाँ रकम पठाएको छ । सोही अनुसार खहरेपाँगु स्वास्थ्य चौकीलाई अस्थायी अस्पतालको रुपमा विकास गर्न लागिएको प्रमुख प्रशासकीय अधिकृत दाहालले जानकारी दिनुभयो । उहाँका अनुसार फलामेसाँघुमा रहेको सूचना केन्द्रको भवनमा अस्थायी अस्पताल सञ्चालन हुने छ । खहरेपाँगु स्वास्थ्य चौकीको भवन जीर्ण रहेकाले सूचना केन्द्रमा गाउँपालिकाले अस्थायी अस्पताल सञ्चालन गर्न लागेको हो । अस्पतालका लागि आवश्यक पाटेशन लगायतका काम गाउँपालिकाले गरिरहेको बताउनुभयो ।

नेपाल सरकारले पाँच लाख रुपियाँ बेड, चार लाख ५० हजार डाक्टर, नर्स व्यवस्थापन र ५० हजार रुपियाँ औषधी खरिदका लागि रकम उपलब्ध गराएको छ । गाउँपालिकाले अस्थायी अस्पतालका लागि चाहिने कर्मचारी आवश्यकताको सूचना प्रकाशित गरिसकेको जनाएको छ । केही दिन मै अस्थायी अस्पताल सञ्चालन गर्ने गाउँपालिकाको तयारी छ ।

शंकरदसाको संयोजकत्वमा उप–समिति गठन

फलामेसाँघुमा अस्थायी अस्पताल सञ्चालनमा लागि उप–समिति गठन गरिएको छ । शुक्रबार खहरेपाँगु अस्पताल व्यबस्थापन समितिका अध्यक्ष एवम् नेपाली काँग्रेसका नेता गणेश लामाको अध्यक्षतामा बसेको बैठकले समाजसेवी शंकरदास लामा (राजु) को संयोजकत्वमा पाँच सदस्य समन्वय समिति गठन गरेको हो ।

समितिको सदस्यमा बबिता बोहरा, नीरबहादुर लामा, दिपेश लामा र कुन्सान लामा रहनुभएको छ । उक्त समितिले अस्थायी अस्पताल सञ्चालन तथा फलामेसाँघुमा टहरा बनाएर बसेको बस्तीलाई हटाउन पहल गर्ने छ । बैठकमा रोशी गाउँपालिकाका अध्यक्ष डीबी लामा, गाउँपालिकाका प्रमुख प्रशासकीय अधिकृत डम्बरु दाहाल, वडा न १ का वडा अध्यक्ष श्रीदास लामा लगायत अस्पताल सञ्चालक समिति पदाधिकारीको उपस्थिती रहेको थियो ।

१५ दिनमा बस्तीबाट हट्न सूचना

बैठकले १५ दिनभित्रमा फलामेसाँघुबाट टहरा बनाएर बसेकालाई हट्न सूचना जारी गरेको छ । साविकको खहरेपाँगु गाविस वडा न ६ मा रहेको कित्ता नम्बर ५४२ भित्र बसोबास गरिरहेकालाई असोज १७ गते भित्र हट्न सूचना जारी गरिएको छ । वडा न १ का वडा अध्यक्ष श्रीदास लामा सहित करिब ४२ वटा घर टहरा बनाएर व्यापार व्यवसाय गर्दै आइरहेका छन ।

वडा अध्यक्ष श्रीदास लामाले आफूले पहिला घर भत्काएर अस्पताल निर्माणका लागि जग्गा खाली गर्ने बताउनुभयो । व्यक्ती स्वयमले घर टहरा हटाउन सूचनामा भनिएको छ । यदी नहटाएमा कानून बमोजिम हटइने उल्लेख छ । उक्त सार्वजनिक जग्गामा विगत २५ बर्ष देखि स्थानीयले घर टहरा बनाएर बस्दै आएका छन । अन्यत्र जग्गा भएका यहाँ आएर बसेकाले हटन समस्या नहुने समितिको ठहर छ । यहाँ रोशी गाउँपालिका वडा न १, २ र ३, नमोबुद्ध नगरपालिका वडा न ८ र ९ का स्थानीयले सार्वजनिक जग्गामा घर टहरा बनाएर बसेका छन ।

घर टहरा हटेसँगै पालिकाले उक्त क्षेत्रमा कम्पाउण्ड लगाएर संरक्षण गर्ने र नेपाल सरकारबाट आएको रकमले भौतिक संरचना निर्माण प्रक्रिया अगाडि बढाउने गाउँपालिका अध्यक्ष डीबी लामाले जानकारी दिनुभयो ।
अस्पताल व्यवस्थापन समितिका अध्यक्ष गणेश लामाले यस भेगको विकाससँगै स्वास्थ्य क्षेत्र जस्तो संवेदनशिल विषयमा राजनीति नगर्न आम नागरिकलाई अपिल गर्नुभयो । उहाँले सबै साथ र सहयोगले मात्र अस्पताल निर्माण गर्न सकिने बताउनुभयो ।

१० शैया अस्पताल निर्माणका लागि यस आर्थिक बर्षमा ८५ लाख स्वीकृतको चरणमा रहेको र आगमी आर्थिक बर्षमा १० करोड बजेट आउने प्रमुख प्रशासकीय अधिकृत डम्बरु दाहालले जानकारी दिनुभयो ।

Facebook Comments