काभ्रे,
रोशी गाउँपालिकामा ‘सहकार्य परियोजना’ सुरु भएको छ । सिबिएम ग्लोबलको आर्थिक सहयोगमा स्रोत ब्यवस्थापन तथा ग्रामीण सशक्तिकरण केन्द्र (रिमरेक) ले गाउँपालिकाका अध्यक्ष दिनेश लामाको अध्यक्षतामा हिजो यो परियोजना रोशी गाउँपालिकामा सुरु गरेको हो । यो परियोजनामा एचआरडिसीले अपाङ्गता भएका बालबालिकाको उपचार, हेरचाह तथा अपाङ्गता पहिचान लगायतको क्षेत्रमा काम गर्नेछ ।
कार्यक्रममा गाउँपालिका अध्यक्ष लामाले परियोजना सञ्चालनका लागि आफ्नो पालिकालाई छनोट गरेकोमा रिमरेग संस्थालाई धन्यवाद दिनुभएको छ । नेपालको संविधान २०७२ मा उल्लेखित अपाङ्गता भएका ब्यक्तिहरुको हक अधिकारलाई कार्यान्वयन गर्न यो परियोजनाले भूमिका खेल्ने पालिका अध्यक्ष लामाले विश्वास ब्यक्त गर्नुभयो ।
‘संविधानमा सुनिश्चित भएको अपाङ्गता भएका ब्यक्तिको हक अधिकारलाई कार्यान्वयनमा ल्याउन नागरिक संघसंस्थाको भूमिका महत्वपूर्ण छ । यो परियोजनाले हाम्रो पालिकाभित्र रहनुभएका अपाङ्गता भएका ब्यक्तिहरुको समस्या पहिचान गर्ने र समाधानका लागि साझा प्रयत्न गर्ने छ ।’ लामाले भन्नुभयो , ‘राज्यको मुल प्रवाहमा अपाङ्गता भएका ब्यक्तिहरुलाई ल्याउन सरकारी र गैर सरकारी संघसंस्थाहरुले पहल गर्न जरुरी छ । त्यही पहल अन्तर्गत यो परियोजना हाम्रो पालिकामा लागु भएको हो ।’ अध्यक्ष लामाले यो परियोजना प्रभावकारी बनाउन आवश्यक सहयोग रहने प्रतिबद्धता जनाउनुभयो ।
त्यसैगरी पालिकाका उपाध्यक्ष एवं पालिका स्तरीय अपाङ्गता समन्वय समितिका संयोजक मिम बहादुर वाईबाले परियोजना सञ्चालनपछि अपाङ्गता भएका ब्यक्तिहरुको जीवनमा परिवर्तन आउनुपर्नेमा जोड दिनुभयो । परियोजनाको अवधि सकिएपछि लक्षित वर्गको अपनत्वका विषयमा ध्यानदिनुपर्ने उँहाकोे भनाई छ ।
स्रोत ब्यवस्थापन तथा ग्रामीण सशक्तिकरण केन्द्र (रिमरेक) का कार्यकारी निर्देशक गोकुल गौतमले संविधानमा अपाङ्गता भएका ब्यक्तिहरुका लागि समावेश गरिएका विषयलाई स्थानीय सरकारसँग मिलेर कार्यान्वयन गराउन परियोजनाले भूमिका खेल्ने बताउनुभयो । ‘यो परियोजना अपाङ्गता भएका ब्यक्तिहरुलाई राज्यका विभिन्न तहसम्म कसरी पहुँचमा पुर्याउने भन्ने विषयमा केन्द्रीत हुन्छ ।’ उँहाले भन्नुभयोे, ‘अपाङ्गता भएका ब्यक्तिलाई संगठित गर्नेदेखि आयआर्जन मार्फत आत्मनिर्भर बनाउनसम्म यो परियोजनाले काम गर्नेछ ।’
परियोजना प्रारम्भ कार्यक्रममा सिबिएम ग्लोबलका वरिष्ठ कार्यक्रम अधिकृत सम्झना शाह, रिमरेकका कार्यक्रम प्रबन्धक राजन गौतम, एचआरडिसीका सन्दिप चौधरीले परियोजनाले गर्ने आ–आफ्नो कार्यक्षेत्रको प्रस्तुतीकरण राखेका थिए ।
यो परियोजना २०२८ को डिसेम्बरसम्म सञ्चालनमा आउने छ । परियोजना नमोबुद्ध नगरपालिकामा पनि छिट्टै शुभारम्भ गरिने रिमरेकले जनाएको छ । यसअघि यो परियोजना काभ्रेपलाञ्चोक जिल्लाकै मण्डनदेउपुर नगरपालिका र भुम्लु गाउँपालिकामा ५ वर्षसम्म सञ्चालन गरिएको थियो ।– ईपाना नेपाल
