रोशी सहकर्मी–असोज ३,
२०७७,काभ्रे (कटुन्जेबेशी)/

कोभिड–१९ का कारण लामो समयदेखी रोकिएका बिद्यालय सञ्चालनका लागि रोशी गाउँपालिकाले विभिन्न चरणमा छलफल चलाइरहेको छ । विभिन्न सरोकारवाला निकाय, बिद्यालय प्रधानध्यापक, शिक्षक, अभिभाव लगायतमा छलफल भइरहेको गाउँपालिकाले जनाएको छ ।

गाउँपालिका शिक्षा शाखा प्रमुख रामबहादुर तामाङले पालिका भित्र रहेका सामुदायिक र संस्थागत ७२ वटै बिद्यालय कसरी सञ्चालन गर्ने भन्ने बिषयमा छलफल भइरहेको बताउनुभयो । उहाँका अनुसार प्रत्येक बिद्यालयलाई कुन बिधिबाट पढाउन सक्ने कार्ययोजना पेश गर्न भनिएको बताउनुभयो । पालिकाले भदौ २८ गते नै सबै बिद्यालयलाई ‘बिद्यार्थी सिकाई सहजिकरण निर्देशिका २०७७’ को दफा ३ बमोजिम बिद्यार्थी बर्गिकरण गरी बिद्यार्थीलाई सिकाइमा सहज हुने अवस्था विश्लेषण गरी बिद्यालयले आफ्नो क्षेत्र भित्रका सबै बालबालिकाको सिकाइ सहजिकरण गर्ने कार्ययोजना बनाई गाउँपालिकामा स्वीकृतका लागि असोज २ भित्रमा शिक्षा शाखामा बुझाउन अनुरोध गरिएको थियो । तर सबै बिद्यालयबाट कार्ययोजना आइन नसकेकोले अहिले नै यो अवस्थामा चलाउने भन्न नसक्ने तामाङले जानकारी दिनुभयो ।

उहाँका अनुसार पालिकाले २० भन्दा कम बिद्यार्थी भएका बिद्यालय, ५० भन्दा कम भएका र १०० भन्दा कम भएका बिद्यालय र १०० भन्दा बढी बिद्यार्थी संख्या रहेका बिद्यालयलाई छुट्छुटै मापदण्ड बनाएर सञ्चालन गर्ने योजना बनाइरहेको छ । गाउँपालिकाले ७२ वटै बिद्यालयलाई माक्स र स्यानिटाइजर उपलब्ध गराइरहेको जनाएको छ । प्राथमिक तहका बिद्यालयलाई एक सय माक्स र दुई लिटर स्यानिटाइजर, आधारभुत बिद्यालयलाई ३०० माक्स तीन लिटर स्यानिटाइजर र माध्यमिक बिद्यालयलाई पाँच सय माक्स र चार लिटर स्यानिटाइजर उपलब्ध गराउन सुरु गरेको छ ।

गाउँपालिकाले जेठ २२ गतेदेखी नै रेडियो रोशी १०१.६ मेगाहर्ज मार्फत कक्षा १ देखी १० सम्मको रेडियो कक्षा मार्फत सिकाइ सहजिकरण गर्दै आएको छ । यसले बिद्यार्थीको पढाइलाई सहज बनाएको छ । अहिले पनि असोज ११ सम्म कक्षा सञ्चालन भइरहेको गाउँपालिकाले जनाएको छ । रोशीमा छ हजार नौ सय बिद्यार्थी अध्ययनरत रहेका छन ।

Facebook Comments Box