काभ्रे,रेडियो रोशी,
काभ्रे जिल्लाको नमोबुद्ध नगरपालिकामा स्थानीय तह शिक्षा समुह गठन तथा एक दिवसिय अभिमुखिकरण कार्यक्रम सम्पन्न भएको छ । आज पालिकाका उपप्रमुख रत्न लामाको अध्यक्षतामा युनिसेफ र भुकम्प प्रविधि रास्ट्रिय समाज (NSET) को प्राविधिक सहयोगमा १५ सदस्यीय स्थानीय तह शिक्षा समुह गठन गरिएको हो । स्थानीय तहमा तहगत रूपमा शिक्षा क्षेत्रको निरन्तर सुधार गरी उपलब्धी हासिल गर्न तथा विपद्का समयमा आवश्यक सहजीकरण गरी शैक्षिक गतिविधी सञ्चालनको लागि सहयोग पुर्याउने हेतुले स्थानीय तह शिक्षा समुह गठन गरिएको हो ।
कार्यक्रममा नगरप्रमुख कुन्साङ लामाले नेपाल सरकारले वार्षिक बजेटमा शिक्षा क्षेत्रलाई सधैँ उच्च प्राथमिकतामा राखेर अन्य क्षेत्रको तुलनामा बढी बजेट विनियोजन गरेको भएपनि कतिपय बिद्यालयहरुमा शिक्षा गुणस्तरीय नभएको बताउनुभयो । बिद्यालय भवन ठुलोठुलो भएपनि आजको समयमा ब्यवहारीक र गुणस्तरीय शिक्षा प्रदान हुन नसकेको बताउनुहुदै पालिकामा शिक्षा समुह गठन भएसँगै सुधार आउनेमा बिस्वास ब्यक्त गर्नुभयो ।
त्यसैगरी प्रमुख प्रशासकीय अधिकृत कृष्ण गिरीले शिक्षा समुह गठन हुनु भन्दापनी यसले शिक्षा क्षेत्रमा कत्तिको योगदान पुर्याउन भन्ने पक्ष मुख्य रहेको बताउनुभयो । बिद्यालयमा बिद्यार्थीहरुलाई जागरुक र ब्यवहारिक चेतना बढाउन आवस्यक रहेको उहाँको भनाई छ । नमोबुद्ध नगरपालिकामा नगर शिक्षा योजना बनाउने योजना रहेको पनि उहाँले जानकारी दिनुभयो ।
कार्यक्रममा युनिसेफ र भुकम्प प्रविधि रास्ट्रिय समाज (NSET) का प्रतिनिधिहरु गणेस बिश्वकर्मा, निकेस भन्डारी र समन श्रेष्ठले स्थानीय तह शिक्षा समुह गठनको उदेश्य, यसको पृष्ठभुमी, संरचना, स्थानीय तह शिक्षा समुहको काम, कर्तब्य र अधिकार , अनुगमन र मुल्याङ्कन, आगामी कार्ययोजना, शिक्षा क्षेत्रको विपद पूर्व तयारी तथा प्रतिकार्यको बारेमा प्रस्ट पारेका थिए ।
नगरपालिकाका उपप्रमुख रत्न लामा संयोजक रहने गरी १५ सदस्यीय स्थानीय तह शिक्षा समुह गठन गरिएको हो । सदस्यहरुमा प्रमुख प्रशासकीय अधिकृत कृष्ण गिरी, रामेश्वर अधिकारी, जनक मा.वि का प्र.अ प्रदिप पोख्रेल, राजन अधिकारी, रीता सिग्देल, अमर लामा, राम कुमार श्रेष्ठ, स्थानीय पत्रकार देबराज उप्रेती, पवन लामा र सदस्य सचिव कल्पना घिमिरे रहेका छन् । अन्य ४ जना सदस्यहरु पछि चयन गरिने उल्लेख गरिएको छ ।
यसअघि काभ्रे जिल्लाको रोशी, चौरीदेउराली गाउँपालिका र पनौती नगरपालिकामा स्थानीय तह शिक्षा समुह गठन भैसकेको युनिसेफ एवं भुकम्प प्रविधि रास्ट्रिय समाजका प्रतिनिधि समन श्रेष्ठले जानकारी दिनुभयो ।
कार्यक्रममा नगरप्रमुख कुन्साङ लामा, प्रमुख प्रशासकीय अधिकृत कृष्ण गिरी, सूचना अधिकारी बुद्धिराज अर्याल, पालिकाका शिक्षा शाखा प्रमुख, नगर युवा परिषद् कार्यकारी उपाध्यक्ष रामेश्वर अधिकारी, वातावरण अधिकृत सन्तोष काफ्ले, रोजगार संयोजक अमृत खनाल, बिभिन्न वडाका वडा अध्यक्षहरु , बिभिन्न बिद्याालयका प्र.अ एवं बिब्यस अध्यक्ष लगायतको सहभागिता रहेको थियो ।
