काभ्रे,
२००७ सालमा जहानियाँ राणा शासन अन्त्य भएर प्रजातन्त्र स्थापना भएको दिनको सम्झनामा आज राष्ट्रिय प्रजातन्त्र दिवस विभिन्न कार्यक्रम गरी मनाइँदै छ । हरेक फागुन ७ गतेका दिन यो दिवस मनाइन्छ । दिवसको अवसरमा सैनिक मञ्च टुँडिखेलमा हुने विशेष समारोहमा राष्ट्रपति, उपराष्ट्रपति, प्रधानमन्त्री, प्रधानन्यायाधीश, सभामुख, जनप्रतिनिधि, राष्ट्रसेवक कर्मचारी, सुरक्षाकर्मी, सार्वजनिक तथा सामुदायिक संघसंस्था र शैक्षिक तथा प्राज्ञिक प्रतिष्ठानका पदाधिकारीलगायत सहभागी हुँदैछन् ।
समारोहमा सेनाको हेलिकोप्टरबाट ‘राष्ट्रिय प्रजातन्त्र दिवस, २०८०’ लेखिएको व्यानर चक्रपथ वरपर प्रदर्शन गर्ने तथा टुँडिखेलमा हेलिकोप्टरबाट पुष्पवृष्टि र झण्डा प्रदर्शन गर्ने कार्यक्रम तय भएको छ । प्रजातन्त्र दिवसका अवसरमा आज सरकारले सार्वजनिक बिदा दिएको छ ।
