काभ्रे,
११४ औँ अन्तर्राष्ट्रिय महिला दिवसको अवसरमा काभ्रे जिल्लाको नमोबुद्ध नगरपालिकाले नेतृत्वदायी भूमिकामा रहेका महिला तथा बिभिन्न क्षेत्रमा निरन्तर योगदान पुर्याएका ब्यक्तित्वहरुलाइ सम्मान गरेको छ । हरेक वर्ष मार्च ८ तारिखका दिन यो दिवस मनाउने गरिन्छ । नारी मुक्ति आन्दोलनकी अभियन्ता क्लारा जेट्किनले सन् १९११ मार्च ८ मा महिला कामदारमाथि भएको श्रम शोषणविरुद्ध आवाज उठाएको दिनको स्मरणमा विश्वभर महिला दिवस मनाउने प्रचलन छ । यस वर्षको महिला दिवसको नारा महिलामा लगानी, सभ्य र समुन्नत समाजको थालनी’ रहेको छ ।
आज नगरपालिकाको सभाहलमा एक कार्यक्रम गर्दै नगरपालिकाले काभ्रे जिल्लाका ११ सरकारी कार्यालयको नेतृत्व गरिरहेका ११ जना महिला, मानवअधिकारकर्मी र जेष्ठ नागरिकलाई सम्मान गरेको हो । सम्मानित हुनेहरुमा जिल्लाको प्रशासनिक नेतृत्व गर्ने प्रमुख जिल्ला अधिकारी रुद्रादेवी शर्मा, जिल्ला प्रहरी प्रमुख प्रहरी उपरिक्षक (एसपी) बसुन्धरा खड्का, स्वास्थ्य कार्यालय प्रमुख अनिता खनाल, पशु सेवा कार्यालय प्रमुख डा. श्रृजा वाग्ले, जिल्ला आयुर्वेद स्वास्थ्य केन्द्रका प्रमुख डा.वशंवदा कौडिन्न्यायनी, शिक्षा विकास तथा समन्वय इकाई प्रमुख देवका ढकाल, खाद्य प्रविधी तथा गुण नियन्त्रण डिभिजन कार्यालय प्रमुख मनिषा चापागाई, स्वास्थ्य बिमा बोर्ड काभ्रेका संयोजक मुना निरौला, पनौती जलविद्युत्त केन्द्र प्रमुख सविना उप्रेती, गुठी संस्थान प्रमुख उर्मिला आचार्य, राष्ट्रिय विमा कम्पनी लिमिटेड प्रमुख चण्डिका सापकोटा रहेका छन् ।
त्यसैगरी मानवअधिकारकर्मी भोजराज तिमल्सिना , नगर क्षेत्रभित्रै जेष्ठ नागरिक १ सय ३ बर्षीय गेन्द्रप्रसाद कुइकेल र ९९ बर्षीय ठूलीमाया लामालाई नगरपालिकाले सम्मान गरेको छ । नगर प्रमुख कुनसाङ लामा, उपप्रमुख रत्नबहादुर लामा, प्रमुख जिल्ला अधिकारी रुद्रादेवी शर्माले उनीहरुलाई सम्मान गरेका थिए ।
कार्यक्रममा बोल्दै प्रमुख जिल्ला अधिकारी रुद्रादेवी शर्माले काभ्रे आएपछि सबैभन्दा धेरै महिला उपस्थित कार्यक्रममा सहभागी हुन पाएकोमा खुशी व्यक्त गर्दै उनले महिला माथि हुने हिंसा कम गर्न सबैेले प्रतिवद्धता व्यक्त गर्नुभएको छ ।
नगर उपप्रमुख रत्नबहादुर लामाले बिना बर्दीको प्रहरी तयार गर्नको लागि नमोबुद्ध नगरपालिकाले विभिन्न काम गर्ने प्रतिवद्धता जनाउनुभयो । नगरपालिकालले महिला दिवसमा बर्षेनी कुनै एक रचनात्मक कृयाकलाप सञ्चालन गर्दै आएको महिला, बालबालिका तथा समाज कल्याण उपशाखा प्रमुख तारादेवी सुनुवारले जानकारी दिनुभयो । कार्यक्रममा राष्ट्रिय तथा स्थानिय कलाकारहरुले प्रस्तुती दिएका थिए ।
