काभ्रे,
काभ्रे जिल्लाको सदरमुकाम धुलिखेलस्थित धुलिखेल अस्पताल र बनेपा नगरमा रहेको शिर मेमोरियल अस्पतालमा सामाजिक सुरक्षा कोषमा आबद्ध भएका नागरिकको उपचार सेवा सुरु गरिएको छ । दुई अस्पताल र सामाजिक सुरक्षा कोषबीच गत जेठमा छुट्टाछुट्टै द्विपक्षीय सम्झौता भई सामाजिक सुरक्षा कोषमा सूचीकृत भएका नागरिकको उपचार सेवा सुरु गर्ने सहमति अनुसार दुवै अस्पतालले उक्त सेवा सुरु गरेको अस्पतालहरुले जनाएका हुन् । सम्झौताअनुसार सूचीकृत भएको व्यक्ति बिरामी हुँदा कोषबाट उपचार खर्चवापत वर्षमा बढीमा एक लाखसम्म पाउने छ । उपचारवापतको रकम दाबी गर्न कोषमा न्यूनतम तीन महिना योगदान गरेको हुनुपर्ने जनाइएको छ ।
धुलिखेल अस्पतालका प्रशासन प्रमुख प्रद्युम्न श्रेष्ठका अनुसार सामाजिक सुरक्षा कोषमा सूचीकृत नागरिक बिरामी भएको अवस्थामा अस्पतालले कोषका तर्फबाट ८० प्रतिशत प्राप्त गर्छ भने व्यक्तिले २० प्रतिशत तिर्नु पर्नेछ । उनले नागरिकलाई थप सहजताका लागि यो कोष उपयोगी देखिएकाले सेवा सुरु गरिएको बताउनुभयो । कोषमा योगदान गरिरहेका श्रमिकले नजिकैको जुनसुकै अस्पतालमा उपचार गराउन सक्ने व्यवस्था गरिएको छ । कोषले उपचारवापतको कुल दाबी रकमको ८० प्रतिशत अस्पताल वा व्यक्तिको बैंक खातामा एक हप्तादेखि १५ दिनभित्र जम्मा गरिदिने उल्लेख गरीएको छ ।
