काभ्रे,
रोशी गाउँपालिकामा उद्योग वाणिज्य संघ गठन भएको छ । हिजो (शनिबार) एक कार्यक्रमको बिच गणजित बल (मनिष) को अध्यक्षतामा रोशी उद्योग वाणिज्य संघ गठन भएको हो । जिल्ला समन्वय समिति काभ्रेका उप–प्रमुख रिमबहादुर तामाङ, गाउँपालिका अध्यक्ष दिनेश लामाले कार्यक्रमको उद्घाटन गरेका हुन् । गणजित बल (मनिष)को अध्यक्षतामा गठन भएको संघको प्रथम उपाध्यक्ष कान्छा मान लामा, द्वितीय उपाध्यक्ष वृक माया तामाङ, महासचिव बिकास लामा, सचिव निर्जला थापा आचार्य र कोषाध्यक्ष चन्द्रबहादुर लामा छन् । सदस्यहरुमा मञ्जु लामा, कविता रायमाझी, अमृत लामा, लक्ष्मी वाईबा, आशा लाल लामा, बिर सिं लामा रहेका छन् । जिल्ला प्रशासन कार्यालय, रोशी गाउँपालिकामा दर्ता, सुचिकृत भइसकेको उद्योग वाणिज्य संघले शनिवारबाट कटुञ्जेवेशीमा कार्यालय समेत सञ्चालनमा ल्याएको छ।
कार्यक्रमलाई सम्बोधन गर्दै जिल्ला समन्वय समिति काभ्रेका उप–प्रमुख तामाङले परम्परागत रुपमा कुनै पनि उत्पादन गर्दा त्यसले लागत समेत बढाउने भन्दै व्यवसायिकरणमा जोड दिदै युवाहरुले केही न केही उद्यम गर्नुपर्ने तर्क गर्दै उनले रोशीमा गठन भएको उद्योग वाणिज्य संघले यहाँको समृद्धीमा भुमिका खेल्ने प्रतिबद्धता जनाउनुभयो ।
त्यसैगरी गाउँपालिका अध्यक्ष दिनेश लामाले देशमा ठूला उद्योग स्थापना हुन नसकेको तर्क गर्दै स्थानीय तहमा कृषिमा आधारित, साना, मझौला, घरेलु उद्योगलाई प्राथमिकता दिनुपर्ने बताउनुभयो । । उत्पादन भन्दा बजारिकरणको समस्या प्रमुख देखिएको भन्दै उनले सहकार्य गर्न स्थानीय तह तयार रहेको बताए ।
रोशी उद्योग वाणिज्य संघका अध्यक्ष गणजित बल (मनिष)ले सबै पक्षको सहयोग र सहकार्यमा नै अघि बढ्ने भन्दै उनले सीप विकास तालिम, आयआर्जनका कार्यक्रम सञ्चालन गर्न स्थानीय तहलाई अनुरोध गर्नुभयो ।
कार्यक्रममा नेपाल उद्योग वाणिज्य महासंघका केन्द्रीय सदस्य मञ्जुकुमार कोजू, वरिष्ठ पत्रकार इश्वरी ओझा, धुलिखेल उद्योग वाणिज्य संघका अध्यक्ष कोमलसुन्दर श्रेष्ठ, नमोबुद्ध उद्योग वाणिज्य संघका अध्यक्ष बसुनारायण श्रेष्ठ, गाउँपालिकाका प्रवक्ता समेत रहेका वडा नं १२ का अध्यक्ष वसन्तकुमार तामाङ लगायतले आ–आफ्नो भनाई राखेका थिए ।