काभ्रे,
ललितपुरको एक टहरोमा आगलागी हुँदा मृत्यु हुनेको संख्या चार पुगेको छ । दुई छोरी र श्रीमतीपछि श्रीमान सञ्जयको पनि मृत्यु भएसँगै मृतकको संख्या ४ पुगेको हो । ललितपुर महानगरपालिका–१७ स्थित मोबिल भण्डार गरिएको टहरोमा गत वैशाख २३ गते आगलागी हुँदा सञ्जय गिरीको परिवारका सदस्यहरु घाइते भएका थिए । शनिबार सञ्जयको समेत मृत्यु भएको जिल्ला प्रहरी परिसर ललितपुरका एसएसपी शेखर खनालले जानकारी दिनुभयो । सञ्जय ग्वार्कोस्थित किस्ट अस्पतालको भेन्टिलेटरमा थिए ।
सोही अस्पतालमा सञ्जयकी श्रीमती रुपा गिरीको गत ३१ वैशाखमा मृत्यु भएको थियो । आगलागी भएको भोलिपल्ट २४ गते सञ्जयका छोरीहरू क्रमशः ८ वर्षीया प्रिया र ३ वर्षीया एलिसा गिरीको मृत्यु भएको थियो । आगलागीमा परी घाइते भएका सञ्जयका भतिज १५ वर्षीय नित गिरीको उपचार जारी छ । उनको अवस्था सामान्य छ ।उनलाई नर्मल वार्डमा सारिएको ललितपुर प्रहरीले जनाएको छ ।
