काभ्रे,
प्रधानमन्त्री पुष्पकमल दाहाल प्रचण्ड लगायत मन्त्रीहरूले आफ्नो सम्पत्ति विवरण सार्वजनिक गरेका छन् । गत बिहीबार बसेको मन्त्रिपरिषद् बैठकले प्रधानमन्त्रीसहित सबै मन्त्रीहरूको सम्पत्ति विवरण सार्वजनिक गर्ने निर्णय गरेको थियो । सोहि निर्णयअनुसार प्रधानमन्त्री तथा मन्त्रीहरूले आफ्नो सम्पत्ति विवरण सार्वजनिक गरेका हुन् । प्रधानमन्त्री प्रचण्डले चितवनको भरतपुर महानगरपालिका–१४ मा १४ कठ्ठा जग्गासहितको एउटा घर रहेको सम्पत्ति विवरणमा उल्लेख गर्नुभएको छ ।
स्वर्गीय धर्मपत्नी सीता दाहालको नाम रहेको जग्गा र घर आफ्नो पैतृक सम्पत्ति भएको विवरणमा उल्लेख छ । प्रधानमन्त्री प्रचण्डले आफ्नो नाममा एभरेस्ट बैंकमा २५ लाख रुपैयाँ रहेको र उक्त रकम प्रतिनिधिसभा सदस्यका हैसियतमा प्राप्त भएको उल्लेख गर्नुभएको छ । उहाँले ५ तोला सुन रहेको र उक्त सुन पनि पैतृक नै भएको सम्पत्ति विरणमा उल्लेख गर्नुभएको छ ।
यस्तै उपप्रधानमन्त्री तथा गृहमन्त्री रवि लामिछानेले पनि सम्पत्ति विवरण सार्वजनिक गर्नुभएको छ । प्रधानमन्त्री तथा मन्त्रिपरिषद् कार्यालयको वेबसाइटमा राखिएको विवरणअनुसार गृहमन्त्री लामिछानेसँग बैङ्क खातामा एक लाख दश हजार नगद रहेको छ । भक्तपुरमा पैतृक रूपमा प्राप्त भएको एक रोपनी एक आना जग्गा रहेको समेत उल्लेख छ । यसबाहेकको अरु चलअचल सबै सम्पत्ति उहाँले श्रीमतीको नाममा देखाउनुभएको छ ।
यस्तै, उपप्रधान एवम् परराष्ट्रमन्त्री नारायणकाजी श्रेष्ठको सम्पत्ति विवरणमा झण्डै ३८ रोपनी पैतृक जग्गा गोरखामा रहेको उल्लेख छ । राष्ट्रिय वाणिज्य बैङ्कमा सिंहदरबारमा एक लाख २२ हजार ९१८ रुपैयाँ बचत रहेको देखाउनुभएको छ ।
यस्तै माओवादी केन्द्रका अध्यक्ष प्रचण्डले दिएको बा. १० च ५७९८ नम्बरको महिन्द्रा गाडी पनि उहाँले सम्पत्ति विवरणमा राख्नुभएको छ ।
एकीकृत समाजवादीका मन्त्री धनबहादुर बुढाले सम्पत्ति विवरणमा सात वटा घर रहेको देखाउनुभएको छ । मन्त्री बुढाको डोल्पाको ठूली भेरी नगरपालिका वडा नम्बर ३ मा ४ वटा घर उल्लेख छ । यो सम्पत्ति पैतृक भएको बुढाले उल्लेख गर्नुभएको छ । त्यस्तै काठमाडौमा पनि मन्त्री बुढाको दुई वटा घर रहेका छन् । यी घर–घडेरी उहाँको र श्रीमती हिमालीको नाममा रहेको उल्लेख छ ।
मन्त्रीहरूमा सबैभन्दा धनि मन्त्री भने भौतिक पूर्वाधार तथा यातायात व्यवस्था मन्त्री रघुवीर महासेठ देखिनु भएको छ । जनकपुर उपमहानगरपालिकामा ४ हजार २ सय वर्गमिटर जग्गा, साँढे २ तले घर, ललितपुरको भैँसेपाटीमा २ रोपनी १३ आना, २ दाम १ पैसा जग्गा र त्यसमा रहेको साढे २ तले घर रहेको छ । यस्तै श्रीमती जुलीकुमारी महतोको नाममा धनुषा क्षिरेश्वरनाथमा ७ रोपनी, ३ आना जग्गा, सिन्धुलीको कमलामाई नगरपालिकामा ४ कट्टा जग्गा, ललितपुर महानगरपालिकामा १ रोपनी ७ आना जग्गा, जनकपुरमा ३ कट्टा जग्गा रहेको छ । यस्तै रघुवीरको नाममा धनुषामा १ बिघा १५ कट्टा जग्गा रहेको छ । नगद तर्फ २ करोड २५ लाख रुपैयाँ सम्पत्ति रहेको छ । सुन ४३ तोला, चाँदी १५० केजी रहेको छ । ७ थान औँठी, ३ थान सिक्री, ३ जोडी कानमा लगाउने र २ जोडी चुरा रहेको छ ।
शिक्षामन्त्री सुमना श्रेष्ठले आफ्नो सम्पत्ति विवरण सार्वजनिक गर्नुभएको छ । सार्वजनिक गरिएको सम्पत्ति विवरण अनुसार उहाँसँग एनआईसी एसिया बैङ्क र एभरेस्ट बैङ्कमा १ करोड ५२ लाख रकम मौज्दात रहेको छ । दुवै स्रोत उहाँले पारिश्रमिक रहेको जिकिर गर्नुभएको छ । यस्तै उहाँसँग बिहे र हजुरआमाको शेषपछि प्राप्त ११ तोला सुन, बिहेका बेला उपहार पाएको एकसय तोला चाँदी र १÷१ सेट हिराको हार र हिराको टप रहेको उल्लेख गर्नुभएको छ । सवारी साधनका रूपमा एउटा स्कुटर र २० लाख रुपैयाँमा खरिद गरेको ईभी गाडी रहेको उहाँले विवरणमा उल्लेख गर्नुभएको छ ।
यस्तै, अर्थमन्त्री वर्षमान पुनले आफ्नो गृहजिल्लामा रोल्पामा घरसहित ८ सय २० वर्गमिटर जग्गा भएको सम्पत्ति विवरणमा उल्लेख गर्नुभएको छ । उक्त सम्पत्ति पैतृक भएको उल्लेख छ । अर्थमन्त्री पुनले एनएमबी बैंक पुल्चोक शाखाको खातामा ३३ लाख ७० हजार ६१८ रुपैयाँ रहेको विवरणमा उल्लेख छ ।
यस्तै, वन तथा वातावरण मन्त्री नवलकिशोर साह सुडीको विवरणमा सप्तरीको हनुमाननगर कंकालिनी नगरपालिका वडा नम्बर ९ मा दुई वटा घर र एउटा निर्माणाधीन रहेको विवरणमा उल्लेख गर्नुभएको छ । त्यस्तै श्रीमती साबित्री देवी साह सुडीको नाममा पनि पाँच वटा घर र शैलेशकुमार साहको एउटा घर रहेको उल्लेख छ । श्रीमती सावित्री देवी साह सुडीसँग ५६ तोला सुन र ६५० ग्राम चाँदी रहेको छ । सुन र चाँदी विवाह गर्दा ससुराली र बुबा आमाबाट उपहारस्वरूप प्राप्त भएको जनाएको छ । यस्तै उहाँले १२ बोरको राइफल बन्दुक रहेको समेत आफुसँग रहेको उल्लेख गर्नुभएको छ ।– सीआईएन
