काभ्रे,
सुर्खेतमा आज बिहान भएको जिप दुर्घटनामा परी ४ जनाको मृत्यु भएको छ । वीरेन्द्रनगरको रातानाङ्गला नजिकै आज बिहान भएको जीप दुर्घटनामा परी चार जनाको मृत्यु भएको हो । बिहान करिब २ बजेतिर भे १ च २५६० नम्बरको जिप दुर्घटनामा परेको हो ।
दुर्घटनामा कालीकोटको शुभकालिका गाउँपालिका ३ का नमराज विक, तन्त विक र उहाँका छोरा बिरेन्द्र विकको घटनास्थलमै मृत्यृ भएको र एक जनाको परिचय खुल्न बाँकी रहेको जिल्ला प्रहरी कार्यालय सुर्खेतका प्रहरी निरीक्षक पूर्ण केसीले बताउनुभयो । जीपमा ८ जना सवार रहेको अनुमान गरिएको प्रहरीले जनाएको छ । दुर्घटनामा घाइते जिप चालक कालीकोट खाँडाचक्र ९ का २५ वर्षीय नरेन्द्र विष्ट र शुभकालिका–३ भर्ताका ३८ वर्षका नरी कामीको सुर्खेतमा उपचार भइरहेको प्रहरीले जनाएको छ । जीप सडकबाट ३०० मिटर तल खसेको र घटनाबारे थप अनुसन्धान भइरहेको प्रहरीले जनाएको छ ।
