काभ्रे,
नेपाली राष्ट्रिय क्रिकेट टिमले आज १० वर्षपछि आईसीसी टीट्वान्टी विश्वकपमा प्रतिस्पर्धा गर्दै छ । नेदरल्याण्ड्ससँग नेपालले राति सवा ९ बजे अमेरिकाको डालासस्थित ग्रान्ड प्रेरी रङ्गशालामा प्रतिस्पर्धा गर्नेछ । यसअघि नेपालले पछिल्लो पटक सन् २०१४ मा ट्वान्टी २० विश्वकप खेलेको थियो । अहिलेसम्म यी दुई टिमले १२ टी–२० आईमा एकअर्काको सामना गरेका छन्, जसमा नेदरल्याण्ड्सले ६ र नेपालले ५ खेल जितेको छ ।
विश्वकपमा भने नेपाल र नेदरल्याण्ड्स पहिलोपटक एकअर्काबीच आमनेसामने हुन लागेका हुन् । नेपाली टोलीका कप्तान रोहित पौडेलले आफूहरू उच्च मनोबलका साथ मैदानमा उत्रन लागेको बताउनुभएको छ । हिजो आईसीसीले गरेको पत्रकार सम्मेलनमा उहाँले नेदरल्याण्डससँगको खेल जित्दै विजयी सुरुवात गर्ने उद्धेश्यका साथ रणनीति बनाइएको बताउनुभएको हो ।
यसैबिच, प्रधानमन्त्री पुष्पकमल दाहाल ‘प्रचण्ड’ले विश्वकपमा उत्कृष्ट प्रदर्शनका लागि नेपाली क्रिकेट टोलीलाई शुभकामना दिनुभएको छ । आज एक वक्तव्य जारी गर्दै उनले विश्वकपले नेपालको पहिचान थप उच्च बनाउने विश्वास व्यक्त गर्नुभएको छ ।
प्रधानमन्त्री दाहालले नेपाली टोलीलाई ऐतिहासिक सफलता प्राप्त हुनेमा आफू विश्वस्त रहेको बताउनुभयो । सगरमाथा र बुद्धको देश भनेर चिनिने नेपाल अब क्रिकेटको देशका रूपमा समेत स्थापित हुन लागेको उल्लेख गर्दै प्रधानमन्त्री दाहालले आफ्नो नेतृत्वको सरकारले खेलक्षेत्रको विकास र खेलाडीको प्रोत्साहनका लागि निरन्तर महत्त्वपूर्ण निर्णय गरी कार्यान्वयन गर्दै आइरहेको बताउनुभयो ।
