काभ्रे,रेडियो रोशी,
काभ्रेपलाञ्चोक जिल्लाको रोशी गाउँपालिका वडा नम्बर ११ लाई ‘अनिवार्य तथा निःशुल्क आधारभूत शिक्षा’ लागू वडा घोषणा गरिएको छ । आज (सोमबार) रोशी गाउँपालिकाका प्रमुख प्रसाशकिय अधिकृत राम बहादुर तामाङको प्रमुख आतिथ्यतामा ११ नं वडालाई अनिवार्य तथा निःशुल्क शिक्षा लागू भएको घोषणा गरिएको हो । वडामा रहेका सबै बालबालिका विद्यालय गएको र आधारभूत तहसम्म निःशुल्क शिक्षा प्राप्त गरेको शुनिश्चितता भएपछि वडालाई अनिवार्य तथा निःशुल्क शिक्षा लागु वडा घोषणा गरीएको हो ।
११ नं वडाको लगभग ८ सय २८ घरधुरीमा ४ देखि १३ बर्षसम्मका ६ सय २६ बालबालिका रहेकोमा सबै बालबालिका विद्यालयको पहुँचमा भएको वडा अध्यक्ष लालकुमार पाख्रिनले बताउनुभयो । वडाको जनसङ्ख्या ४ हजार ६ सय ३३ रहेको छ ।
४ बर्षदेखि १३ बर्षसम्मका बालबालिकालाई आधारभूत शिक्षा अनिवार्य र निशुल्क भएको सुनिस्चित भएपछि वडालाई अनिवार्य तथा निःशुल्क शिक्षा लागू’ घोषणा गर्ने ब्यवस्था छ ।
अनिवार्य तथा निःशुल्क शिक्षा घोषणा कार्यान्वयनका लागि नेपाल सरकारले अनिवार्य तथा निःशुल्क शिक्षा ऐन २०७५, अनिवार्य तथा निःशुल्क शिक्षा नियमावली २०७७ र राष्ट्रिय शिक्षा नीति २०७६ स्वीकृत गरेको छ । गाउँपालिकाले पनि शिक्षा नीति २०८० पारित गरीसकेको छ । १२ वटा वडा रहेको रोशी गाउँपालिकाको अन्य ९ वटा वडाहरु अनिवार्य तथा निःशुल्क शिक्षा लागू’ वडा घोषणा भैसकेको प्रमुख प्रसाशकिय अधिकृत राम बहादुर तामाङले बताउनुभयो ।
कार्यक्रममा प्रशासन प्रमुख धनबिर तामाङ, नेपाली काङ्ग्रेस वडा नं ११ का वडा सभापति मिन बहादुर रुचाल, नेकपा एमाले वडा नं ११ का पार्टि अध्यक्ष, नेकपा माओबादि ११ नं वडाका पार्टि प्रतिनिधि हरिसरण रायमाझि, कार्यपालिका सदस्य बिनिता कुमारी तामाङ, वडा भित्रका ९ वटा बिद्यालयका बिब्यसहरु, पधान्याध्यापकहरु लगायतको सहभागिता रहेको थियो ।
