काभ्रे,
काभ्रे जिल्लाको महाभारत गाउँपालिका–४ महादेवटारमा भएको दम्पतीको हत्याका आरोपीलाई प्रहरीले पक्राउ गरी सार्वजनिक गरेको छ । आज प्रहरीले पत्रकार सम्मेलन गरेर हत्यामा संलग्न सिन्धुपाल्चोकको जुगल गा.पा.–१ घर भएका एकेन्द्र सार्कीलाई सार्वजनिक गरेको हो । गत जेठ ७ गते महाभारत गाउँपालिका वडा नम्बर ४ महादेवटारका मान बहादुर बल र श्रीमती केकै माया बल तामाङनीको विभत्स हत्या भएको थियो । एकेन्द्र सडक निर्माणमा मजदुरी गर्न महाभारत गाउँपालिकाको वडा नम्बर ४ पुगेका थिए ।
एकेन्द्रले जेठ ७ गते राती मान बहादुर बल र निजको श्रीमती केकै माया तामाङनीलाई फलामको रड र फलामको घन लगायतका औजारहरु प्रयोग गरी विभत्स ढङ्गले हत्या गरेको खुल्न आएको छ ।
एकेन्द्रले मान बहादुर बलको मोबाइल, मृतक केकै माया तामाङनीले लगाएका सुनका गरगहनाहरु, मृतकहरुको पसलमा रहेको रिचार्ज कार्डहरु तथा नगद रकम समेत लुटी लगेका प्रहरी अनुसन्धानबाट खुलेको हो ।
प्रहरीका अनुसार एकेन्द्र सार्कीको ऋण ३ लाख रुपैयाँभन्दा बढी पुगिसकेको थियो । त्यसमध्ये ५० हजार जेठभित्र तिर्नुपर्ने थियो । सडकमा काम गर्ने उनी बेलाबेला किनमेलका लागि मानबहादुर दम्पतीले सञ्चालन गरेको पसलमा जान्थे । त्यसक्रममा केकैमायाले लगाएको सुनका गहनाहरू देखेपछि लुटपाट गर्ने उद्देश्यले हत्या गरेको प्रहरी अनुसन्धानबाट खुलेको छ । एकेन्द्रलाई ज्यानसम्बन्धी कसुरमा म्याद थप गरी अनुसन्धान भइरहेको काभ्रे प्रहरीले जनाएको छ ।
