काभ्रे, रेडियो रोशी,
तेमाल गाउँपालिका वडा नं ३ सरमथलीले वडा भित्रका अशक्त, ज्येष्ठ नागरिक र एकल महिलाहरुलाई घर र पायक पर्ने टोलमा पुगेर सामाजिक सुरक्षा भत्ता प्रदान गरेको छ । वडा अध्यक्ष बिष्णु बहादुर तामाङको सक्रियता र सिटिजन्स बैंक पोखरी नारायणस्थान शाखा बैंक को समन्वयमा हिजो बैंक सम्म जान नसक्ने लाभग्राही लगभग ३५ जनालाई टोल, वडा कार्यालय र घरमै सामाजिक सुरक्षा भत्ता वितरण गरेको वडा अध्यक्ष बिष्णु बहादुर तामाङले जानकारी दिनुभयो ।
वडा अध्यक्ष तामाङले आफुहरुलाई पायक पर्ने ठाउँमा आएर सामाजिक सुरक्षा भत्ता वितरण गरेपछि सहज भएको लाभग्राहीहहरुले बताएका छन् । ‘भत्ता लिनकै लागि थुप्रै दुःखकष्ट भोग्नु पर्दथ्यो’, घरमै भत्ता पाएपछि निकै खुशी लागेको छ –’ एक ज्येष्ठ नागरिकले भन्नुभयो ।
ज्येष्ठ र अशक्त नागरिकहरुलाई सजिलो होस् भन्ने उद्देश्यसहित सामाजिक सुरक्षा भत्ता प्राप्त गर्ने ज्येष्ठ नागरिक, अपाङ्गता भएका व्यक्तिहरू, एकल महिला तथा बैंकसम्म पुग्न नसक्ने लाभग्राहीहरुलाई बैङ्कसँग समन्वय गरी घर, टोल र वडा कार्यालयमै सामाजिक सुरक्षा भत्ता वितरण गरेको वडा अध्यक्ष तामाङले बताउनुभयो । ‘घरैमा भत्ता दिने कार्यक्रमले बैंङ्कसम्म जान नसक्नेलाई धेरै सहज भएको छ ’ यो कार्यले वडाका नागरिक र जनप्रतिनिधिबीचको सम्बन्ध अझै धेरै सुमधुर हँुदै जाने छ ।’–अध्यक्ष तामाङले भन्नुभयो ।
वडा कार्यालयले घर र टोलमै आएर हात–हातमा सामाजिक सुरक्षा भत्ता दिएपछि लाभग्राहीहरू निकै खुशी देखिएका छन् ।
