काभ्रे,
माध्यमिक शिक्षा परिक्षा (एसईई) मा उत्कृष्ट नतिजा ल्याउने विद्यार्थीलाई नेपाल विद्यार्थी संघ (नेविसंघ) काभ्रेले सम्मान गरेको छ । हिजो (शनिवार) नेविसंघ काभ्रेले बनेपामा उत्कृष्ट नतिजा ल्याउने विद्यार्थीलाई सम्मान गरेको हो । बनेपा नगरपालिका ४ स्थित लिंकन इन्टरनेसनल स्कुलकी छात्रा स्मृति श्रेष्ठले ४ जीपीए ल्याएर जिल्लामै सर्वोत्कृष्ट हुँनुभएको थियो । उँहासहित ८ सय जना विद्यार्थीहरुलाई नेविसंघ काभ्रेले सम्मान गरेको छ ।
नेपाली कांग्रेसका केन्द्रीय सदस्य शिवप्रसाद हुमागाई, बाग्मती प्रदेशका पूर्वमन्त्री समेत रहेका नेपाली कांग्रेस काभ्रेका सभापति तीर्थ लामा, नेपाल विद्यार्थी संघका सभापति दुजाङ शेर्पा लागतयले उनीहरुलाई सम्मानपत्र प्रदान गरेका थिए ।
कार्यक्रममा नेपाली कांग्रेसका केन्द्रीय सदस्य शिवप्रसाद हुमागाईले विद्यार्थीले प्राप्त गरेका सफलता परिवार, आफन्त, समाज, जिल्ला र राष्ट्रको नै भएको भन्दै भोलीको पुस्ताको असल नेतृत्व गर्न सक्ने बन्न सक्नुपर्ने तर्क गर्नुभयो ।
बाग्मती प्रदेशका पूर्वमन्त्री समेत रहनुभएको नेपाली कांग्रेस काभ्रेका सभापति तीर्थ लामाले उच्च शिक्षा सफलताको कामना गर्दै दक्ष जनशक्ति तयार भएर देशको सेवा गर्न अनुरोध गर्दै त्यसको लागि सघाउन तयार भएको बताउनुभयो ।
नेपाल विद्यार्थी संघका सभापति दुजाङ शेर्पाले विद्यार्थी हकहितको लागि नेविसंघ सधै अग्रणी रहेको भन्दै एसईई उर्तीण सबैलाई आवस्यकता पर्दा सहयोग गर्न नेविसंघ सधै तयार रहेको बताउनुभयो ।
कार्यक्रममा नेपाली कांग्रेस काभ्रेका सचिव रहेका नेपाल विद्यार्थी संघ काभ्रेका पुर्व सभापति माधव ढकाल, सचिव गुणराज मोक्तान, प्रतिनिधी सभा क्षेत्र नं १ का सभापति दिनेश लामा लगायतले उच्च शिक्षाका अवसर र चुनौतीबारे चर्चा गरका थिए ।
