काभ्रे,
पहिरोले बगाएर त्रिशूली नदीमा बेपत्ता भएका दुई वटा बस र शव खोजीका लागि भारतीय उद्धार टोली उपकरणसहित खटिएको छ । त्रिशूलीमा हराएका दुईवटा बस अहिलेसम्म भेटिएका छैनन् । सिमलतालमा असार २८ गते पहिरोमा परी त्रिशूली नदीमा दुई वटा बससँगै खसेका २३ जना यात्रुको शव भेटिएको छ । नदीमा डुबेका ६२ यात्रुमध्ये हिजो अपराह्नसम्म २३ जनाको शव भेटिएको छ । ३९ जनाको अवस्था अझै पत्ता लाग्न सकेको छैन । शवहरू भारतको सीमा क्षेत्रसम्म भेटिएका छन् । शवहरु चितवनको गोलाघाट, सालबास र सिसवार, नवलपुरको गैँडाकोट, भुताहा, त्रिवेणी व्यारेज क्षेत्रलगायत घटनास्थलबाट तटीय क्षेत्रमा फेला परेका छन् ।
असार २८ गते वीरगञ्जबाट काठमाडौँ आउँदै गरेको बागमति प्रदेश ०३–००६ ख १५१६ नम्बर र काठमाडौँबाट गौरतर्फ जाँदै गरेको बागमती प्रदेश ०३–००१ ख २४५९ नम्बरको बस लेदोसहितको पहिरोले बगाएर त्रिशूली नदीमा बेपत्ता भएको थियो । दुवै बसमा सवार ६५ यात्रुमध्ये ३ जना पौडिएर बाहिर निस्कन सफल भएका थिए भने बाँकी बेपत्ता भएका थिए ।
