काभ्रे,
हिजो रातीदेखि अवरुद्ध बनेको बि.पि. राजमार्ग सुचारु भएको छ । वर्षाको कारण राजमार्गका बिभिन्न स्थानमा आएको बाढी र पहिरो हटाएर आज बिहान ८ः३५ बाट राजमार्ग सुचारु भएको इलाका प्रहरी कार्यालय मंगलटारका प्रमुख ईश्वर कार्कीले जानकारी दिनुभयो ।
वर्षाका कारण रोशी–९ पिन्थलीबेशी, मंगलटार बिरुवाडाँडामा रहेको फेदीखेला र साङखोला, रोशी–११ कालढुंगा, रोशीकै ११ र १२ को सिमानाको माम्ती खोलामा आएको लेदो हटाएर सडक सञ्चालन गरिएको हो ।
त्यस्तै रोशीकै पिप्लेमा आएको पहिरो, पानीतारे नजिक झरेको पहिरो पनि हटाइएको छ । काभ्रे र सिन्धुलीको सिमाना बर्खेखोलामा आएको बढीले बिगारेको सडक पनि मर्मत गरिएको छ ।
बीपी राजमार्गका विभिन्न स्थानमा सडक अवरुद्ध भएपछि सो बाटो हुँदै पूर्व र तराईका जिल्ला हिँडेका सवारी साधनहरू प्रहरीले काभ्रेको भकुण्डेबेसी र सिन्धुलीमा होल्ड गरेको थियो । राजमार्ग सुचारु भएसँगै सवारिसाधनहरु चलेका छन् ।
