काभ्रे,
सम्भावित जोखिम न्यूनीकरणका लागि बीपी राजमार्गमा साउन महिनाभरी साँझ ५ बजेदेखि बिहान ५ बजेसम्म गाडी चलाउन रोक लगाइएको छ । जिल्ला प्रशासन कार्यालय काभ्रेपलाञ्चोक र जिल्ला प्रशासन कार्यालय सिन्धुलीले आज बेग्ला–बेग्लै सूचना जारी गर्दै १ साउनदेखि साउन मसान्तसम्म साँझ ५ बजेदेखि बिहान ५ बजेसम्म निजी तथा सार्वजनिक सवारी चलाउन रोक लगाएका हुन् ।
प्रमुख जिल्ला अधिकारी नेतृत्वको जिल्ला सुरक्षा समिति काभ्रेपलाञ्चोकको बैठकले १ साउनबाट साँझ ५ बजेदेखि बिहान ५ बजेसम्म रातिको समयमा सवारी चलाउन रोक लगाउने प्रस्ताव सिन्धुलीलाई गरे अनुसार मंगलबार जिल्ला प्रशासन कार्यालय सिन्धुलीले पनि सूचना निकालेर सहमति गरेको थियो ।
हाल देशमा मनसुन सक्रिय अवस्थामा रहेको हुँदा कुनै पनि समयमा वर्षातका कारण विपद् (बाढी, पहिरो) को अवस्था सिर्जना हुनसक्ने भएकोले त्यस्ता विपद्जन्य घटनाबाट हुन सक्ने जोखिमलाई न्यूनीकरण गर्न र यात्रुको सुरक्षाका लागि जिल्ला सुरक्षा समिति काभ्रेपलाञ्चोकको सुरक्षा बैठकको निर्णयानुसार बीपी राजमार्गको काभ्रेभञ्ज्याङ्ग – भकुण्डेवेसी हुँदै सिन्धुलीतर्फ जाने सवारी १ साउनदेखि साँझ ५ बजेदेखि बिहान ५ बजेसम्म १ महिनाका लागि निषेध गरिएको सूचनामा भनिएको छ ।
यसअघि काभ्रे, सिन्धुली र रामेछापका अन्तरजिल्ला सुरक्षा समन्वय समितिको सिन्धुलीको खुर्कोटमा बसेको बैठकले बाढीपहिरोको जोखिमलाई मध्यनजर गर्दै ७ असारदेखि साँझ ६ः३० बजेदेखि बिहान ५ बजेसम्म सवारी चलाउन रोक लगाइएको थियो ।
