काभ्रे,
रोशी गाउँपालिका वडा नं ६ मा रहेको हिमालयन माध्यमिक विद्यालयको पुननिर्माण सम्पन्न भई हस्तान्तरण गरिएको छ । बागमती प्रदेशका खानेपानी, उर्जा तथा सिंचाइ मन्त्री तिर्थ लामाको प्रमुख आतिथ्यतामा सम्पन्न कार्यक्रममा हिमालयन माविको पुननिर्मित भवन हस्तान्तरण गरिएको हो । २०७२ सालको विनासकारी भुकम्पले क्षतिग्रस्त रोशी गाउापालिका वडा नं. ६ सिपाली चिलाउनेमा रहेको हिमालयन माविको भवन क्षतिग्रस्त भए पछि नेपाल सरकार र यशियाली विकास बैंकको आर्थिक सहयोगमा नेपाल सरकार, शिक्षा तथा प्रविधि मन्त्रालयको केन्द्रीय आयोजना कार्यन्वयन इकाइ विपत उत्थानशील विद्यालय परियोजना मार्फत पुननिर्माण भएको विद्यालयको भवनको चाबी मन्त्री लामाले रोशी गाउापालिकाका अध्यक्ष दिनेश लामालाई हस्तान्तरण गर्नुभयो ।
उक्त भवन एसियाली विकास बैंकको ५ करोड ७१ लाख ६९ हजारको लागतमा निर्माण गरिएको थियो ।कार्यक्रममा मन्त्री लामाले शिक्षा, स्वास्थ्य, खानेपानी, बाटो, सिंचाइ लगायतको काम गर्न आफू तम्तयार भएको बताउँदै बिकास निर्माणको काममा आफूले कुनै पार्टी तथा दल नभनी लागिपर्ने बताउनुभयो । काभ्रे कांग्रेसका सभापति समेत रहेका लामाले नयाँ शैलीका समाज निर्माण गर्न उभिने बताउँदै नेपालको संविधानको दायराभित्र रहेर आम नेपाली जनताको मुहार परिवर्तनका लागि उभिने बताउनुभयो । उहाँले शिक्षा क्षेत्रमा उल्लेख्य परिवर्तनका लागि आफू कटिबद्ध रहेको बताउनुभयो । काभ्रेली जनताको मुहारमा उज्यालो ल्याउनको निमित्त कुनै जाति, धर्म नहेरी आफूले सक्दो प्रयास गर्ने मन्त्री लामाले बताउनुभयो ।
कार्यक्रममा जिल्ला समन्वय प्रमुख दीपक गौतमले शिक्षाको लागि गाउँबाट शहरतिर जाने प्रवृत्ति रोक्नुपर्नेमा जोड दिनुभयो । कार्यक्रममा रोशी गाउापालिका अध्यक्ष दिनेश लामा, नमोबुद्ध नगरपालिकाका प्रमुख कुनसाङ लामा, जिल्ला समन्वय समितिका उपप्रमुख प्रेमबहादुर तामाङ, प्रमुख जिल्ला अधिकारी पुण्यविक्रम पौडेल, धुलिखेल नगरपालिकाका उपप्रमुख निराजन जंगम, सुरक्षा निकायका प्रमुख, गाउँपालिकाका वडा अध्यक्षहरु लगायतको उपस्थिति रहेको थियो ।
