काभ्रे
सरकारी अस्पतालमा डेङ्गी सङ्क्रमितहरूको उपचार निःशुल्क हुँने भएको छ । स्वास्थ्य तथा जनसङ्ख्या मन्त्री प्रदीप पौडेलको उपस्थितिमा स्वास्थ्य प्रतिष्ठान तथा मेडिकल कलेज लगायतकाका प्रमुखहरूसँग हिजो भएको छलफलले सरकारी अस्पतालमा सङ्क्रमितहरूको निःशुल्क उपचार गर्ने निर्णय गरेको हो ।
मन्त्रालयका प्रवक्ता डा. प्रकाश बुढाथोकीका अनुसार बैठकले आ–आफ्नो कार्यालयमा सतर्कता र सचेतनाका कार्यक्रमहरू सञ्चालन गर्ने, डेङ्गी डेस्क स्थापना गरी फोकल पर्सन तोक्ने र सरकारी अस्पतालमा बिरामीको उपचार निःशुल्क गर्ने निर्णय गरेको हो ।
नेपालका ७३ वटा जिल्लाहरूमा गरेर हालसम्म २ हजार ३ सय ६५ डेङ्गी सङ्क्रमितहरू पुष्टी भएका छन् । जसमध्ये तनहुँमा एक ५० वर्षिय पुरुषको मृत्यु भएको छ । यस वर्ष सबैभन्दा बढी बागमती प्रदेशमा डेङ्गी सङ्क्रमित भेटिएका छन् । महाशाखाको तथ्याङ्कअनुसार बागमती प्रदेशमा ७ सय ४७ जनामा डेङ्गी सङ्क्रमण पुष्टि भएको छ । त्यसैगरी कोशीमा ५ सय ३७, गण्डकीमा ५ सय ८, लुम्बिनीमा २ सय ४७, सुदूरपश्चिममा २ सय ४२, मधेसमा ४७ र कर्णाली प्रदेशमा ३८ जनामा डेङ्गी सङ्क्रमण पुष्टि भएको छ ।
