काभ्रे,
रोशी गाउँपालिका–३ शिखरआम्बोटेका कृषकहरुलाई करेसाबारी तरकारी खेती सम्बन्धि तालिम सुरु भएको छ । वडा कार्यालयको आयोजनामा कृषि तथा पशु कार्यक्रम अन्तर्गत शुरु भएको तालिमको हिजो (बिहिबार) गाउँपालिकाका अध्यक्ष दिनेश लामाले उद्घाटन गर्नुभएको हो । हिजो १० गतेबाट शुरु भएको तालिम असोज १४ गते सम्पन्न हुने छ ।
तालिमको उद्घाटन गर्नुहुदै अध्यक्ष लामाले “रोशीको दृष्टि, पर्यटन र कृषि” भन्ने नारालाई गाउँपालिकाले अवलम्बन गरेकाले कृषि र पशुपालनलाइ पहिलो प्राथमिकता दिएको बताउनुभयो । कृषि र पर्यटन सम्बन्धी बिगतमा विभिन्न कार्यक्रमको आयोजना गरेको र आगामी दिनमा पनि त्यस्ता कार्यक्रमलाई प्राथमिकतामा राखेर अगाडी बढ्ने उहाँले बताउनुभयो ।
त्यसैगरी, वडाध्यक्ष धनजित लामाले करेसाबारीमा कसरी तरकारी खेती गर्ने भन्ने बारेमा सिकाउन तालिमको आयोजना गरेको बताउनुभयो । यो तालिमले तरकारी खेती गरेर आम्दानी बदाउन मद्धत पुग्नेछ भन्ने विश्वास लिएको उहाँले बताउनुभयो ।
४० जना महिलाहरुले सहभागीता जनाएको यस तालिम वडा भित्रका विभिन्न ४ स्थानमा एक एक दिन तालिम संचालन हुने बताईएको छ । हिजो तालिम उद्घाटन सँगसँङ्गै कार्यक्रममा सहभागीहरुलाई विभिन्न ६ थरीका तरकारीको बिउ र मिनिकिट बितरण गरीएको थियो ।
